Ministri për Evropën dhe Punët e Jashtme, Ferit Hoxha, ka zhvilluar takimin e parë me ambasadoren e re të Bashkimit Evropian në Shqipëri, Sofia Moreira de Sousa.

Përmes një postimi në rrjetin social X, Hoxha tha se në fokus të bisedës ishte procesi i anëtarësimit të Shqipërisë në BE, përgatitjet për hapat e ardhshëm dhe rëndësia e ruajtjes së ritmit të negociatave.

“Mund të jetë e shtunë dhe një ditë e bekuar, por në rrugëtimin tonë drejt anëtarësimit në BE nuk ka pauzë dhe kohë të lirë. Kënaqësi të takohem për herë të parë me Drejtuesen e re të Delegacionit të BE-së në Shqipëri, Ambasadoren Sofia Moreira de Sousa. Patëm një shkëmbim thelbësor mbi procesin e anëtarësimit të Shqipërisë në BE, duke përfshirë përgatitjet për momentet e ardhshme në udhëtimin tonë evropian dhe rëndësinë e ruajtjes së ritmit dhe momentumit të negociatave. Nënvizova angazhimin e vazhdueshëm të Shqipërisë për të realizuar reformat dhe për të përparuar me vendosmëri në të gjithë kapitujt negociues.

Asnjëherë nuk mund ta theksojmë mjaftueshëm se procesi i anëtarësimit duhet të mbetet i bazuar fort në meritë, rezultate dhe besim të ndërsjellë. Shqipëria po bën pjesën e saj, me vendosmërinë, disiplinën dhe ndjesinë e qëllimit që kërkon ambicia jonë. Qasja jonë është e qartë: përmes reformave, ne sjellim më shumë Evropë në Shqipëri çdo ditë, ndërsa ecim me vendosmëri dhe qartësi drejt përfundimit të negociatave dhe objektivit tonë historik për t'u bërë anëtar i Bashkimit Evropian brenda kësaj decade”, shkroi Hoxha.

Në përfundim të mesazhit, Hoxha i uroi mirëseardhjen ambasadores së re të BE-së në Shqipëri, duke e cilësuar zgjerimin si një sukses të përbashkët.

“Mirë se vini në Shqipëri, Ambasadore Moreira de Sousa. Suksesi juaj do të jetë një sukses edhe për partneritetin tonë të veçantë, ashtu sikurse zgjerimi është një sukses i përbashkët: më shumë përparim për Shqipërinë, por edhe një investim strategjik për një Evropë më të fortë, më të sigurt dhe më të bashkuar”, përfundon Hoxha.

Ndërkohë edhe Sofia Moreira de Sousa, përmes një postimi në X, tha se si ambasadore e BE-së, do ta mbështesë Shqipërinë në çdo hap të këtij rrugëtimi. Nga ana tjetër ajo vuri në dukje edhe zjarret që kanë përfshirë vendin tonë veçanërisht gjatë orëve të fundit në jug të vendit. Moreira de Sousa shprehet se BE-ja është e gatshme ta mbështesë Shqipërinë në përballimin e situatave të tilla

"Ruajtja e ritmit të reformave lidhur me integrimin evropian është thelbësore për përparimin e Shqipërisë drejt BE-së. Sot zhvillova takimin tim të parë me Ministrin për Evropën dhe Punët e Jashtme, Ferit Hoxha, me fokus progresin e Shqipërisë drejt anëtarësimit në BE.

Si Ambasadore e BE-së, jam këtu për ta mbështetur Shqipërinë në çdo hap të këtij rrugëtimi. Shpreha gjithashtu solidaritetin tim lidhur me zjarret e fundit. BE-ja është e gatshme ta mbështesë Shqipërinë në përballimin e situatave të tilla",shkroi ajo në X.