Ministri gjerman për Europën takim me Ramën, kreun e SPAK dhe përfaqësues të opozitës: Të çohet përpara lufta kundër korrupsionit dhe krimit të organizuar

Kreu i Grupit Parlamentar të PD Gazment Bardhi ka zhvilluar një takim me ministrinn gjerman të Shtetit për Europën, Gunther Krischbaum. 

Përmes një postimi në rrjetet sociale, Bardhi shkruan se në fokus të këtij takimi ka qenë integrimi i Shqipërisë në BE.

‘Kënaqësi takimi me Ministrin per Europën në Ministrinë e Jashtme Gjermane z. Gunther Krischbaum.  Integrimi Europian i Shqipërisë duhet të jetë një proces që synon implementimin e standardeve europiane në vend, dhe jo të përdoret si justifikim për të mbuluar keqqeverisjen. Opozita mbështet plotësisht procesin e integrimit të bazuar në standarde dhe në meritë. 

Në këtë proces, theksova se mbetet jetike për Shqipërinë garantimi i zgjedhjeve të lira dhe të ndershme, qeverisja e mirë në dobi të qytetarëve, lufta ndaj korrupsionit dhe lidhjeve të qeverisjes me krimin e organizuar, lejimi i organeve të drejtësisë të bëjnë me integritet dhe pavarësi punën e tyre në përputhje me parimet e shtetit ligjor, si dhe funksionimi demokratik i institucioneve, veçanërisht i Kuvendit të Shqipërisë', shkruan Bardhi.

Kryetarja e Këshillit Kombëtar për Integrimin Europian në Kuvend dhe deputetja e Partisë Demokratike Jorida Tabaku u takua të premten me Gunther Krichbaum, Ministër i Shtetit për Europën në Qeverinë Federale të Gjermanisë, që ndodhet në një vizitë zyrtare në Tiranë.

Takimi pati në fokus zhvillimet më të fundit politike në vend dhe veçanërisht procesin e integrimit europian dhe sfidat që po e pengojnë atë.

Deputetja demokrate shprehu shqetësim për presionin në rritje që sipas saj qeveria po ushtron ndaj sistemit të drejtësisë dhe amendamentet e Kodit të ri Penal që po shqyrtohet në Kuvend.

Ndër të tjera ajo kritikoi qeverinë për mungesën e vullnetit të treguar në lidhje me zbatimin e rregullores së BE-së për kontrollin e investimeve, që sipas saj, përbëjnë rreziqe për sigurinë, transparencën dhe konkurencën e ndershme.

Gjatë takimit, Tabaku pretendoi se qeveria po e përdor integrimin më shumë si fasadë dhe retorikë politike sesa si proces reformash. Sipas saj, me ritmet e treguara, qeveria mbetet “vite dritë” larg integrimit real.

Tabaku gjithashtu vuri theksin tek angazhimi i Partisë Demokratike në procesin e integrimit europian, që sipas saj, është jetik për të ardhmen dhe për ndërtimin e institucioneve funksionale, demokratike dhe të besueshme.

Kryetari i Grupit Parlamentar të Partisë Socialiste, Taulant Balla është takuar sot me Gunther Krichbaum, Ministër i Shtetit për Europën në Qeverinë Federale të Gjermanisë dhe një nga politikanët më të rëndësishëm të CDU-së gjermane, i cili ka ardhur në një vizitë zyrtare në Shqipëri.

Në përfundim të takimit, Balla vlerësoi bashkëpunimin historik të dy vendeve dhe falenderoi Gjermaninë për mbështetjen e fuqishme të anëtarësimit të vendit në BE

“Gjithmonë një kënaqësi të takohem me Gunther Krichbaum, i cili në këtë vizitë zyrtare në Shqipëri vjen si Ministër i Shtetit për Europën në Qeverinë Federale të Gjermanisë. Shumë mirënjohës zotit Krichbaum për vëmendjen dhe mbështetjen e vazhdueshme qoftë në Bundestag, qoftë tani si anëtar i Qeverisë gjermane. Gjermania rënditet e para me mbështetjen e drejtpërdrejtë akorduar Shqipërisë. Sot Shqipëria dhe Gjermania kanë nivelin më të lartë historik të marrëdhënieve të shkëlqyera dypalëshe dhe në kuadër të organizatave ku dy vendet tona aderojnë. Gjermania mbështet fuqimisht anëtarësimin e Shqipërisë në BE” shkroi Balla në Facebook.