Mirditë, flakët rrezikojnë 16 banesa
në Lezhë digjen 15 ha pyje

MIRDITE – Një zjarr i fuqishëm që ka përfshirë prej 3 ditësh zonën e Oroshit në rrethin e Mirditës, ka djegur deri më tani mbi 100 hektarë pyje, ndërsa rrezikohen edhe 16 banesa. Për shkak të terrenit të thyer ndërhyrja e zjarrfikësve është e vështirë, ndërsa drejt zonës janë dërguar mjete për të vënë nën kontroll situatën.

Sipas informacioneve nga shërbimi zjarrfikës të qarkut të Lezhës, flakët kanë rrethuar disa shtëpi banimi dhe vëmendja është përqendruar për të penguar depërtimin e tyre drejt banesave.

Për përballimin e situatës është kërkuar ndihmë edhe nga Lezha e Laçi, ndërsa për shuarjen e flakëve janë angazhuar edhe banorë të zonës.

Një tjetër vatër zjarri ka djegur rreth 15 hektarë me pyje në komunën e Zejmenit në Lezhë, ndërsa bëhet e ditur se për shuarjen e flakëve janë angazhuar punonjës të shërbimit pyjor.

(eh/Gre.M/Shqiptarja.com)