Morën peng dhe dhunuan 2 vetë në Berat, arrestohen 3 persona! Shkak dyshohet një borxh që i kishin të arrestuarve (EMRAT)

3 persona janë arrestuar në Berat pasi akuzohen se kanë marrë peng dhe kanë dhunuar një 39-vjeçar dhe një 40-vjeçar. Hamit Kanani, Arben Bilçari, Edmond Hoxha janë prangosur për ngjarjen e rëndë të ndodhur në lagjen 'Uznovë' në qytetin e Beratit. Burime për Report Tv bëjnë me dije se dyshohet për një borxh që shtetasit L.B dhe B.H u kishin tre të arrestuarve. Kjo ka bërë që tre të arrestuarit t'i marrin peng për disa orë me makinë duke i çuar diku periferi të Beratit dhe i kanë ushtruar dhunë fizike. Më pas i kanë lënë të lirë dhe dy të dhunuarit kanë bërë denoncimin.

"Nga specialistët e Seksionit për Krimet u bë arrestimi në flagrancë i shtetasve H.K, 27 vjeç, A.B., 57 vjeç, dhe E.H.,53 vjeç, të tre banues në lagjen “Uznovë”, Berat. Arrestimi i tyre u bë pasi në lagjen “Uznovë”, në bashkëpunim me njëri-tjetrin dhe për motive të dobëta, i kanë hequr lirinë dhe i kanë dhunuar fizikisht shtetasit L.B., 39 vjeç dhe B.H., 40 vjeç, të dy banues në lagjen “30 vjetori”, Berat. Materialet i kaluan Prokurorisë së Rrethit Gjyqësor Berat për veprime të mëtejshme", njofton policia.

K.T./M.Q./Shqiptarja.com

TAG:
• Berat
• pengmarrje