Moti i keq ka shkaktuar anulimin e lundrimit për një nga dy tragetet që do të nisej nga porti i Durrësit drejt Barit të Italisë mbrëmjen e 4 janarit.

650 udhëtarët e prekur nga kjo situatë janë asistuar nga kompanitë përkatëse, të cilat kanë marrë masat për ridrejtimin e tyre me nisjet pasuese. Pasagjerët janë njoftuar pasdite për të mos iu drejtuar portit dhe pritet të nisen në drekë.

Autoriteti Portual i Durrësit bën me dije se situata aktuale e lëvizjes së trageteve për ditën e sotme është si më poshtë:

-Trageti “Rigel VII” mbërrin në Portin e Durrësit në orën 11:00 dhe do të niset në orën 13:00.

-Trageti “Rigel V” pritet të mbërrijë rreth orës 15:00 dhe do të niset rreth orës 23:00.

-Trageti “Rigel III” parashikohet të mbërrijë rreth orës 21:00 dhe do të niset pas mesnatës.

-“GNV Cristal” është planifikuar të niset në orën 23:00.

Autoriteti Portual Durrës vijon të monitorojë me vëmendje situatën meteorologjike dhe lëvizjen e mjeteve detare, në bashkëpunim të ngushtë me kompanitë lundruese dhe autoritetet përgjegjëse, me qëllim garantimin e sigurisë dhe mbarëvajtjes së operacioneve portuale.


Lajmi kryesor:

Moti i keq/ Nisin shkarkimet në Koman dhe Vaun e Dejës! Niset për në Brindisi trageti që mbeti në det të hapur
Rendit zhvillimet sipas orarit:
Ora 11:21
Moti i keq/ Trageti Vlorë-Brindisi nuk ankorohet në Port për shkak të erës së fortë! Rrezikon të përplaset me kalatën (VIDEO)

 

Për shkak të kushteve atmosferike të paqëndrueshme dhe erës së fortë, trageti i linjës Vlorë-Brindisi nuk ka mundur të ankorohet në kalatat e portit të Vlorës, pasi ekziston rreziku i përplasjes me kalatën.

Aktualisht, rreth 800 pasagjerë dhe 150 automjete kanë prenotuar për të udhëtuar ditën e sotme, por nisja është pezulluar për arsye sigurie.

Sipas informacioneve zyrtare, do të ketë një tentativë tjetër ankorimi në orën 13:00, me qëllim marrjen e pasagjerëve, nëse kushtet e motit e lejojnë.

Aktualisht trageti po qëndron në Rad ndërsa anijet e vogla të akostuara në Tri Port.

Ndërkohë deri më datë 7 janar, mjetet e peshkimit do të qëndrojnë të ankoruara në Triport, deri në një njoftim të dytë nga Kapitaneria e Portit.

Xh.K/Shqiptarja.com