Siguria e fëmijëve në shkolla është kthyer në një shqetësim të përditshëm për prindërit. Rastet e bullizmit, dhuna dhe tensionet kanë shtyrë dhjetëra prej tyre të reagojnë.

Përmes një peticioni publik, prindërit kërkojnë masa për garantimin e sigurisë dhe mirëqenies së fëmijëve të tyre brenda ambienteve shkollore.

Nismëtarja e këtij peticioni është sociologia Marsi Simo.

Peticioni, kërkon rritjen e sigurisë fizike dhe një monitorim më të fortë të rasteve problematike, me qëllim krijimin e një mjedisi më të qetë.  Deri më tani, mbi 1.000 prindër e kanë firmosur peticionin. Hapi i radhës pritet të jetë dërgimi i tij në Ministrinë e Arsimit.

Kërkesat e prindërve

Ne, prindër dhe qytetarë të shqetësuar për të ardhmen e fëmijëve tanë, kërkojmë që arsimi bazë në Shqipëri të garantojë një zhvillim të plotë, cilësor dhe gjithëpërfshirës, i cili i përgjigjet nevojave akademike, emocionale, fizike dhe sociale të nxënësve.

Qëllimi ynë është ndërtimi i një sistemi arsimor që vendos fëmijën dhe mësuesin në qendër, duke garantuar siguri, mirëqenie dhe zhvillim real.

1. Siguri dhe mirëqenie në shkolla

-Të zbatohen protokolle të qarta kundër bullizmit, me mbikëqyrje fizike të vazhdueshme dhe ambiente të sigurta, përfshirë oborret dhe hapësirat sportive.

-Në rast mungese të një mësuesi, të caktohet mësues kujdestar (zëvendësues) që të mbikëqyrë nxënësit dhe të sigurojë vijimësinë e aktivitetit mësimor.

-Të merren masa për eliminimin e shkollave me dy turne, në mënyrë që nxënësit të kenë orar të plotë, mësues të mjaftueshëm dhe më shumë hapësirë për aktivitete fizike, kreative dhe sociale.

 2. Ngarkesë mësimore dhe orare të balancuara

-Detyrat e shtëpisë të jenë të përshtatura sipas moshës, veçanërisht në ciklin fillor.

-Fëmijëve t’u garantohet kohë e mjaftueshme për lojë, relaksim dhe aktivitete psiko-sociale, të domosdoshme për zhvillimin e shëndetshëm emocional.

 3. Lëndë praktike dhe aktivitete zhvilluese

-Lëndët e artit, edukimit fizik dhe aktivitetet psiko-sociale për klasat I–V të zhvillohen nga mësues të specializuar, jo nga mësuesja e klasës/kujdestarja, për të garantuar cilësi dhe profesionalizëm.

-Fëmijët të mos qëndrojnë për periudha të gjata ulur, por të kenë mundësi të shprehin energjinë, kreativitetin dhe aftësitë sociale.

 4. Vakti i drekës në shkollë

-Të ofrohet vakt dreke i balancuar dhe i shëndetshëm në shkollë.

-Nxënësit e ciklit fillor të kenë mundësi të qëndrojnë në shkollë të paktën deri në orën 14:00, në kushte të sigurta dhe mbikëqyrje të përshtatshme.

 5. Mbështetje për fëmijët me nevoja të veçanta

-Çdo fëmijë me nevoja të veçanta të ketë pranë mësues ndihmës gjatë gjithë orarit mësimor, dhe jo vetëm për dy orë, siç ndodh aktualisht.

Kjo është thelbësore për përfshirje reale, mbështetje të vazhdueshme dhe barazi në arsim.

 6. Numër më i ulët nxënësish në klasa

Veçanërisht në shkollat ku numri i nxënësve kalon 35 për klasë, të merren masa për reduktimin e numrit, në mënyrë që të sigurohet mësim më efektiv dhe kujdes individual.

7. Identifikim kombëtar i nevojave të fëmijëve

-Të krijohen teste të standardizuara kombëtare për identifikimin e nevojave të fëmijëve.

-Përcaktimi i nevojave të mos mbetet në dorë të prindit dhe zgjidhjeve private, por të jetë përgjegjësi e sistemit arsimor.

Kjo do të ndihmojë në planifikimin realist të burimeve: numrin e mësuesve, specialistëve dhe kapaciteteve që sistemi ka realisht.

 8. Ambientet stimuluese në arsimin fillor

-Arsimi fillor duhet të ketë vëmendje të veçantë ndaj ambienteve stimuluese, ku fëmijët të prekin, të eksplorojnë, të zbulojnë talentet dhe potencialin e tyre.

Qëllimi është aftësimi i fëmijëve për jetesën në komunitet, secili sipas kapaciteteve të veta.

 9. Mundësia e shkollimit nga shtëpia

-Të krijohen komisione dhe teste të posaçme për vlerësimin e këtyre fëmijëve.

Ka fëmijë që, për arsye emocionale, sensoriale apo psikologjike, nuk e përjetojnë mirë ambientin e mbyllur dhe zhurmat e klasës. Vendosja e tyre në këto kushte pengon zhvillimin e aftësive të tyre.

10. Roli dhe vlerësimi i mësuesit

-Mësuesit duhet të kenë vendin që meritojnë në sistem.

-Të mos mbingarkohen me orë mësimore dhe shkresa administrative.

-Të dëgjohen dhe të përfshihen në vendimmarrje, veçanërisht për:

a.numrin e nxënësve në klasë

b.nevojat reale të fëmijëve

c.ndryshimet në kurrikulë dhe praktikat mësimore

Kohët kanë ndryshuar dhe realiteti i sotëm kërkon që mësuesit të kenë hapësirë për reflektim profesional dhe të raportojnë problematikat reale, në mënyrë që çdo ndryshim të jetë funksional dhe efikas.

Ne kërkojmë që Ministria e Arsimit dhe Sportit të marrë masa konkrete dhe të menjëhershme për të garantuar një arsim cilësor, të sigurt dhe gjithëpërfshirës për çdo fëmijë në Shqipëri.