Napoli mposht kampionët e Europës, shkëlqen Insigne

Napoli dhe Liverpool janë përballur në një miqësore në Edinburgh të Skocisë ku fitues dolën të kaltrit. Nënkampionët e Italisë mposhtën kampionët e Europës Liverpool me një rezultat të pastër 3-0. Padyshim lojtari i ndeshjes dhe protagonisti kryesor i tre golave ishte shtatshkurtri Lorenzo Insigne. Me depërtimet e tij në krahun e majtë napoletanët arritën të fitojnë përballë ekipit të momentit në Europë, Liverpoolit edhe pse në një miqësore. 

Goli i parë u shënua në minutën e 17' nga vetë Insigne i cili me një goditje nga jashtëzonës mposhti me lehtësi portierin Mignolet. Më pas në të 28' Insigne i jep një asist bomberit polak Milik i cili përballë portës nuk e pati të vështirë ta çojë topin drejt rrjetës.

Ndërsa goli i tretë erdhi në pjesën e dytë. Çuditërisht Insigne kësaj radhe u gjend i pamarkuar në krahun e tij duke tentuar një gjuajte e cila u grushtua nga Mignolet por aty ishte Amin Younes që shtyu topin drejt rrjetës. Vlen për t'u përmendur se në këtë ndeshje, kapiteni i kombëtares shqiptare të futbollit Hysaj pati 30 minuta lojë në pjesën e dytë pasi zëvendësoi Giovanni di Lorenzo. 

Të dyja ekipet po përgatiten për sezonin e ri për të cilat kanë pretendime të mëdha këtë vit.

TAG:
• liverpool
• napoli
• miqesore
• lorenzo insigne