Ambasadori në ikje, Florian Rauning, e cilësoi OSBE si një nga mbështetësit tradicionalë të Shqipërisë në ndihmën e dhënë për ngritjen e institucioneve demokratike.
“Kjo është hera e 5-të që largohem nga Shqipëria dhe hera e dytë nga OSBE.
Duke qenë një nga mbështetëset tradicionale të Shqipërisë, OSBE ka ndihmuar në ngritjen e institucioneve demokratike. OSBE nuk ofron as para dhe zgjidhje të shpejta. OSBE ka ofruar gjithmonë zgjidhje afatgjata.
Pritshmëritë e popullit shqiptar janë shumë të larta, por sfida jonë është koha. OSBE do vazhdojë të jetë një partnere e Shqipërisë. Pata rastin të shijoja mirëpritjen nga Vermoshi në Konispol”, u shpreh Rauning.
Më tej ai u shpreh se Shqipëria ka luajtur rol në jetën e tij. “Këtu gjeta bashkëshorten time. U jam mirënjohës të gjithëve”. Ambasadori Raunig do të marrë postin e drejtuesit të Task Forcës për kryesinë austriake të radhës të OSBE-së. Raunig, diplomat karriere nga Austria, drejton Prezencën e OSBE-së në Shqipëri që prej tetorit 2013. Më parë, ai ka shërbyer si ambasador i Austrisë në Shqipëri (2009-2013) dhe në Malin e Zi (2007-2009).
Raunig iu bashkua Prezencës së OSBE-së në Shqipëri për herë të parë në vitin 1997, pak kohë pas krijimit të saj. Më 1998, ai rihapi dhe drejtoi Zyrën Austriake të Bashkëpunimit për Zhvillim në Tiranë dhe themeloi, paralelisht, Zyrën Austriake të Bashkëpunimit në Shkup.
Më 2000-2002, ai ishte menaxher programi për zhvillimin vendor në Delegacionin e Komisionit Evropian në Tiranë. Më 2002-2003, ai shërbeu për Ministrinë e Punëve të Jashtme austriake në Vjenë dhe Lubjanë.
Më 2004, ai iu bashkua Agjencisë Austriake për Zhvillim, të sapokrijuar në Vjenë, përpara se të hapte, në fund të 2005-s, degën e ambasadës austriake të Beogradit në Podgoricë, e cila u bë ambasada austriake në Malin e Zi, pas pavarësisë së vendit.
Raunig studioi shkenca politike, filozofi dhe juridik në Universitetin e Vjenës. Përveç gjermanishtes, Raunig flet edhe shqip, anglisht, frëngjisht, italisht dhe gjuhën malazeze.
Fjala e Plotë e Ambasadorit Florian Raunig
Kjo është hera e pestë që largohem nga Shqipëria dhe hera e dytë që largohem nga Prezenca e OSBE-së. Në 1997-n, pata privilegjin të isha pjesë e ekipit që e hapi këtë Mision dhe në 2013-ën pata privilegjin edhe më të madh të bëhesha kryetari i këtij institucioni. E gjithë kjo periudhë ka qenë kohë ndryshimesh të jashtëzakonshme, herë-herë e trazuar, por gjithmonë mbresëlënëse. Është një histori zhvillimi që shkon dorë-për-dorë me atë të Prezencës së OSBE-së: Duke qenë një nga mbështetëset tradicionale të Shqipërisë, ajo e ka dhënë asistencën e saj në një mënyrë që e pasqyron qartë ecurinë e vendit. Filluam duke e shoqëruar vendin për të dalë nga trazirat e mesit të viteve nëntëdhjetë dhe duke ngritur së bashku institucionet demokratike themelore. Tashmë, është qëllimi ynë i përbashkët që ta përmirësojmë funksionimin dhe ndërveprimin e këtyre institucioneve dita-ditës, në mënyrë që të rritet besimi i qytetarëve dhe që shqiptarët të bëhen plotësisht zotër të demokracisë së tyre. OSBE-ja nuk ofron as para dhe as zgjidhje të gatshme e të shpejta. OSBE-ja ka pasur gjithmonë për qëllim partneritetin e sinqertë dhe shoqërimin afatgjatë drejt një progresi të vazhdueshëm dhe një ndryshimi të qëndrueshëm. Unë do ta quaja këtë punë në themel, një punë e nevojshme për të ushqyer dhe forcuar kulturën e demokracisë dhe respektimin e shtetit të së drejtës. Të gjithë e dimë se ndonjëherë kjo është një punë rraskapitëse, pasi ndryshimi i qëndrueshëm kërkon kohë që të rritet e hapësirë që të marrë frymë. Në të njëjtën kohë, pritshmëritë dhe ambiciet e popullit shqiptar janë shumë të larta. Kjo është plotësisht e kuptueshme, por kjo do të thotë se sfida jonë më e madhe është prapë koha. Më lejoni t’ju siguroj se OSBE-ja do të vazhdojë të jetë një partnere e vërtetë dhe e sinqertë e Shqipërisë, duke e ndihmuar vendin në mënyrë të qëndrueshme dhe të besueshme, duke ndarë, me mendje e me zemër, të njëjtin vizion për të ardhmen e Shqipërisë.
Të dashur miq,
Më lejoni ta mbyll me disa komente personale: Unë e kam jetuar gjysmën e këtyre 26 viteve të fundit në këtë vend. Për më shumë se 13 vjet duke shërbyer në poste, rrethana dhe vende të ndryshme, pata kënaqësinë të zbuloja shumë nga ky vend dhe, ajo çka është më e rëndësishmja, të shijoja mikpritjen dhe miqësinë e njerëzve të tij nga Vermoshi në Konispol. Për më tepër, kam qenë dëshmitar çastesh historike të gëzuara dhe sfiduese gjatë kësaj kohe. Shqipëria ka luajtur një rol të rëndësishëm në jetën time. Gjeta në këtë vend disa nga miqtë dhe kolegët e mi më të mirë. Këtu u njoha me bashkëshorten time, ndërsa vajzat e mia mësuan edhe të flasin shqip, madje me dialekt “tirons”. Ju jam mirënjohës të gjithëve që jeni mbledhur këtu sot. I jam veçanërisht mirënjohës familjes sime, e cila më shoqëroi gjatë gjithë kësaj kohe dhe më dha forcën dhe këmbënguljen që m’u desh për të përmbushur detyrimet e mia. Më lejoni të them vetëm: Ju falem nderit të gjithëve! Të falem nderit, Shqipëri!
Lajme të tjera
-
'Krimet me armë të lehta ndodhin kudo por në Shqipëri është më i ashpër' Ambasadori i OSBE-së: Siguria nuk është vetëm përgjegjesi e policisë
20 Nëntor, 17:32
-
Goditja e korrupsionit politik, financimi i partive dhe kufizimi për punësimin e titullarëve pas mbarimit të detyrës! Zbardhen disa nga propozimet në Komisionin e Posaçëm
13 Nëntor, 09:47 -
Mbahet tryeza e parë për Dokumentin Analitik, ekspertët zbulojnë gjetjet dhe rekomandimet për integritetin e administratës publike dhe konsolidimin e shërbimeve digjitale
4 Nëntor, 20:27 -
'Mashkull, femër apo të tjera', OSBE flet për sondazhin: E konsultuam me Kuvendin
29 Tetor, 09:18
-
Fitorja e partisë proruse, Presidentja e Gjeorgjisë thotë se nuk e njeh rezultatin e zgjedhjeve
27 Tetor, 22:27 -
'Mashkull, femër apo të tjera, çfarë gjinie je?', Tritan Shehu denoncon 'sondazhin' e OSBE-së për deputetët: Fyes, refuzoj ta plotësoj
24 Tetor, 20:21 -
Prapaskenat e garës për sekretarin e Përgjithshëm të OSBE, Shqipëria me kandidaturën e Igli Hasanit mund rivalin turk! Si do zgjidhet në Vjenë
26 Shtator, 17:15 -
Pas Celibashit, ambasadori i OSBE-së në Shqipëri takohet me Presidentin Begaj
7 Qershor, 21:05 -
Vota e diasporës/ OSBE: Mbeten vetëm 10 muaj për ta realizuar, e vështirë edhe për vendet e zhvilluara! Partitë të gjejnë marrëveshje sa më shpejt
4 Qershor, 20:59 -
PROFILI/ Merr detyrën kreu i ri i Prezencës së OSBE-së në Shqipëri, Tarran: Pres me padurim të punoj krah partnerëve shqiptarë
22 Maj, 11:51 -
Lufta në Ukrainë/ Moska: Sulmi në Belgorod nga Kievi u krye me armë të furnizuara nga NATO
12 Maj, 16:45 -
Basha takon ambasadoren e OSBE, në fokus reforma zgjedhore dhe drejtësia
18 Prill, 19:56
