Ndarja nga jeta Ramazan Rragamit, Meta: Kampion i fushës, trajner dhe një qytetar i dashur! Privilegj që e kam njohur

Për ndarjen nga jeta të futbollistit shkodran Ramazan Rragami, ka shprehur ngushëllimet e tij presidenti Ilir Meta.

Ai ka kujtuar momentet më të veçanta të rrugëtimit të sportistit në fushë, ndërsa e ka cilësuar si kampion, por edhe një qytetar të mrekullueshëm dhe të dashur për të gjithë.

"Shumë i pikëlluar për ndarjen nga jeta të Legjendës së futbollit tonë, Ramazan Rragami, njëri prej futbollistëve dhe trajnerëve më të shkëlqyer dhe të dashur të vendit tonë.  Sot kujtojmë, jo vetëm futbollistin e madh të Kombëtares, por edhe kampionin e Vllaznisë dhe të Partizanit.

LEXO EDHE:
U arrestua për atentatin ndaj prokurorit Ndoja në 2019-ën, as Apeli i GJKKO-së nuk pranon lirimin e Ramazan Rrajës

Kujtojmë Rragamin e madh, që bashkë me Zhegën dhe Bizin krijuan trion spektakolare të futbollit shkodran e kombëtar, trajnerin kampion, i cili krijoi "Shpresën" e jashtëzakonshme të Demollarit, Zmijanit, Josës, Jerës, Kushtës, Ocellit, Hodjes, Dedjas, Mersinit, Canajt dhe aq shumë talenteve, e cila u kualifikua në 8-të më të mirat e Europës dhe u bë baza e Kombëtares së mrekullueshme, që mundi Belgjikën dhe krijoi një perspektivë të re për futbollin tonë.

Rragami do të mbahet mend se dy herë skualifikoi Gjermaninë, njëherë në 1967 si titullar i Kombëtares së jashtëzakonshme në barazimin historik kundër nënkampionëve të botës dhe 16 vjet më vonë si trajner i "Shpresës" së mrekullueshme, kur pas triumfit ndaj Gjermanisë në Trir, u kualifikua në 8 ekipet më të mira të Europës.

Ai ishte i jashtëzakonshëm kudo në fushën e blertë si kampion, si trajner, por edhe një qytetar i mrekullueshëm dhe i dashur për të gjithë.  Për mua ishte privilegj ta njihja nga afër këtë njeri të papërsëritshëm në vlera dhe virtyte njerëzore.

Ngushëllimet më të sinqerta familjes së dashur Rragami, miqve dhe bashkëpunëtorëve të tij, Vllaznisë dhe gjithë sportdashësve tanë në këtë ditë zie për humbjen e këtij sportisti të madh dhe të mrekullueshëm.", shkruan Meta.

Lajmi kryesor:

Ndahet nga jeta në moshën 77-vjeçare legjenda e futbollit shkodran, Ramazan Rragami! Lojtari shqiptar që 'detyroi' UEFA-n të ndryshojë rregullin e penalltive

J.GJ./Shqiptarja.com

TAG:
• Ramazan Rraja