TIRANË- Presidenti Ilir Meta është "rikthyer" nga pushimet dhe është kujtuar që të shprehë ngushëllimet e tij për ndarjen nga jeta të Gjon Lulgjuraj, personalitet i shquar i komunitetit shqiptar në Shtetet e Bashkuara të Amerikës.
Ky i fundit, ka ndërruar jetë më 12 gusht në SHBA, por ato ditë mesa duket kreu i shtetit ka qenë me pushime dhe nuk ka pasur kohë për të ngushëlluar familjarët. Me fundin e gushtit, i ka ardhur fundi edhe pushimeve edhe Metës duke bërë kështu që presidenti "t'i kthehet punës së tij me kokë" e duke shkruar mesazhe ngushëllimi në Facebook.
"Me hidhërim mora lajmin për ndarjen e parakohshme nga jeta të z.Gjon Lulgjuraj, personalitet i shquar i komunitetit shqiptar në Shtetet e Bashkuara të Amerikës, kryetar i Organizatës 75-vjeçare shqiptaro-amerikane AANO. Ideator dhe realizues për tre dekada të radio programit të parë në gjuhën shqipe për diasporën shqiptare në Miçigan dhe në Florida, ai spikati si aktivist i palodhur në shërbim të çështjes kombëtare dhe forcimit të lidhjeve shqiptaro-amerikane.
![]()
Vdekja e parakohshme e Gjon Lulgjurajt, është një humbje e madhe dhe e pazëvëndësueshme jo vetëm për familjen e tij, por edhe për mbarë komunitetin shqiptaro-amerikan, të cilëve ju shpreh ngushëllimet më të thella. Personalitete si Gjon Lulgjuraj, me punën, kontributin dhe veprën e tyre jetësore, i kanë bërë dhe i bëjnë nder kombit tonë. I paharruar kujtimi dhe të prehet në paqe", shkruan Meta.
Nuk përjashtohet mundësia që "faji" të jetë edhe i stafit të presidencës të cilët e kanë njoftuar kreun e shtetit për një humbje të madhe siç është ai i Gjon Lulgjurajt, 16 ditë me vonesë...
![](https://shqiptarja.com/template/img/antipiracynote.jpg)
![](https://www.shqiptarja.com/template/img/sh_logo1.png)