TIRANE - Ministri i Drejtësisë Nasip Naço, urdhëron pezullimin e licencës për 6 muaj, përmbaruesit Baftjar Nelaj.  Masat disiplinore të ministrit janë miratuar nga Komisioni Disiplinor i Përmbaruesve Privatë, edhe për përmbaruesit Anjeza M., Helidon Xh., dhe Martin T.

Lajmi konfirmohet nga zyra e shtypit e ministrisë, sipas të cilës shkeljet janë konstatuar pas inspektimeve dhe verifikimeve të zbatimit të procedurave ligjore të vendimeve gjyqësore të iniciuara nga ankesat e qytetarëve. 

Për rastin e përmbaruesit Baftjar Nelaj, masa e pezullimit është kërkuar për shkak të mungesës së dokumentacionit në dosje, mosrespektimin e afateve proceduriale të njoftimit, si dhe veprimtarive jo etike që cënojnë rëndë figurën e përmbaruesit gjyqësor. 

Ndërkohë burime pranë përmbarimit privat bënë të diturse Nela ka ankimuar vendimin e pezullimit 6-mujor, vendim i cili është bllokuar nga gjykata. 


Redaksia Online
(e.n/Shqiptarja.com)