Ndocaj: Ju jeni deputetë mielli
dhe...Leskaj i heq mikrofonin

Deputeti socialist Eduart Ndocaj kritikoi ashpër projektligjin për regjistrimin e emigrantëve, të cilin e cilësoi si të turpshëm. 

“Është e turpshme që flitet për regjistrimin  e emigrantëve. Ku të regjistrohen? Për çfarë e kërkon kjo qeveri këtë regjistër,” ngriti pyetjen Ndocaj ndwrsa tha se Edi Rama nuk e ka mbajtur premtimin e dhënë në Milano, ku u shpreh se emigrantët do të votonin në zgjedhjet lokale.

“Në Milano kryeministri premtoi se do të votojmë në zgjedhjet lokale. Jam i regjistruar njëherë unë, keni 20 vjet që votoni në emër tim. Në zgjedhjet e 23 qershorit unë kam parë skandal. Dini informacion ju çfarë informacioni atë të konsullatës në Milano që do 10 euro me të dhënë informacion, ku është krijuar radha nga stacioni i trenit deri te konsullata, u shpreh ai.

Sipas tij, nëse emigrantët do të votojnë gjysma e deputetëve të kuvendit nuk do të ishin në sallë, ndërsa i quajti kolegët e tij “deputet të miellit”. “Jam i bindur se 50 % e deputetëve nuk kanë për të pas shanse me hy në këtë sallë se emigrantët nuk shiten me thasë mielli. Këto janë deputetë të miellit, jo me programe dhe ide,” u shpreh ai.

Por në këtë moment Ndocajt i mbaroi minutazhi dhe drejtuesja e seancës Valentina Leskaj i kërkoi atij që të lërë foltoren. Por Ndocaj iu përgjigj: “Këto kanë 25 vjet që flasin këtu, më lë t’i them edhe unë dy fjalë”. Por ky arsyetim nuk e bindi Leskajn, e cila si rrallë herë i fiku mikrofonin deputetit.

Ndërkohë në sallë deputetët e opozitës, të cilët fillimisht duartrokitën fjalimin e  Ndocajt, i kërkuan Leskajt që ta lejojë atë të flasë.

Pas insistimit të tyre, drejtuesja e seancës i dha dhe 1 minutë kohë Ndocajt, i cili shfrytëzoi rastin që të fliste edhe për kërcënimin e bërë ndaj tij nga deputeti socialist Arben Ndoka.

“Jam kërcënuar nga individë të PS dhe këtu ka 10 ditë që as nuk është përmend që një deputet kërcënohet me jetë nga njerës të PS, jo nga të ardhur nga qielli. Kërkoj që të merren masa,” tha Ndocaj.

Redaksia Online
(u.s/shqiptarja.com)