Në Dibër disa fshatra pa energji elektrike, 3 grupe të OSHE së Kavajës dhe Durrësit u shkojnë në ndihmë! Rrugët e kalueshme me zinxhir

 

Temperatura të acarta kanë përfshirë Dibrën. Termometri gjatë natës ka shënuar vlerat më të ulëta -13°. Në akset rrugore kombëtare nuk ka më dëborë por ka prezencë të akullit, ndaj drejtuesit e mjeteve duhet të tregojnë kujdes dhe të përdorin mjetet antirrëshqitëse.

Rruga e Arbrit është e kalueshme, por ka prezencë të akullit në orët e para të mëngjesit dhe të darkës. Mbrëmë është bllokuar sërish për më shumë se një orë, tek Hani, për shkak të ngricave. Prezencë të akullit ka edhe tek pishat e Bulqizës edhe pse rruga është kriposur.

Aksi Peshkopi - Kukës ka prezencë të akullit nga Sllova deri në Vasie, ndaj në orët e para të mëngjesit dhe të darkës duhet të përdoren zinxhirët.

Rrugët e njësive administrative janë hapur, po punohet për rrugën e Lurës,  mjetet e bashkisë kanë nisur hapjen e rrugëve të fshatrave. Energjia elektrike është rikthyer në pjesën më të madhe të territorit, por ka ende njësi administrative dhe fshatra pa energji. Prej dy ditësh kanë punuar 6 grupe të OSHE dhe OST, në ndihmë të tyre kanë ardhur edhe 3 grupe  nga Kavaja dhe Durrësi, për të përshpejtuar riparimin e defekteve të shkaktuar nga moti i keq. Mbrëmjen e djeshme është rikthyer energjia në qytetin e Bulqizës, por ka ende disa njësi administrative pa energji.

Fatmirësisht nga zonat e thella nuk ka pasur thirrje për emergjenca shëndetësore në 24 orët e fundit.

Lajmi kryesor:

Reshjet e borës ia lënë radhën ngricave, në Dibër shënohet temperatura -13° C! Hapet bypass i Qafë-Murrizës në rrugën e Arbrit

SI.E./KT/Shqiptarja.com

TAG:
• Diber