Në janar mund të transferohej në Arabi, ish-agjenti i Dwamena: Nuk donte të vinte në vete

Raphael Dwamena fatkeqësisht të shtunën humbi jetën, teksa pësoi një sulm në zemër gjatë kohës që po luhej Egnatia-Partizani, duke ngritur shumë pikëpyetje, pasi në disa vende të Europës nuk ishte lejuar të lunte.

Mirëpo ai më në fund, në dhjetor të 2022, u bashkua me Egnatian ku e pa si mundësi të tregonte edhe njëherë talentin e tij. Talent që e bëri të binte në sy të disa skuadrave, siç ishte Partizanit në Superligë, por edhe në vende të tjera.

Sëfundmi është mësuar se 28-vjeçari ka kryer disa teste mjekësore për llogari të një klubi në Arabinë Saudite, ku edhe ishte gati të transferohej në merkaton e janarit, pasi kishte rënë dakord në shifra.

Dwamena që prej janarit të 2021 kishte vendosur të hiqtë defibrilatorin që mbante në zemër, pasi sipas tij ishte bezdisës dhe i shkaktonte panik. Këtë vendim futbollisti e kishte marrë duke mos pyetur të afërmit dhe as ish-agjentin, i cili kishte këmbëngulur në këtë drejtim.

Agjenti Philipp Degen, njëkohësisht edhe një nga miqtë e tij, në atë periudhë u shpreh: “Duamenën e dua si djalin tim. Është një person i mrekullueshëm, e dua shumë. Por ai thjesht nuk dëshiron të vijë në vete. Ai do të kishte shumë opsione. Mund të bëhej agjent, trajner apo ambasador i futbollit. Ajo që të gjithë i thonë është: ‘Të lutem ndalo’. Zemra e tij sa vjen e bëhet më e dobët. Është një bombë me sahat”. 

Ne.k./Shqiptarja.com

TAG:
• Raphael Dwamena
• philipp degen
• egnatia
• superliga