Në nder të Festës së Flamurit, Plazhi i Darëzezës në Fier u kthye më 30 nëntor 2025 në qendrën kombëtare të sportit të kalërimit, ku u zhvillua me sukses Gara Kombëtare me Kuaj 2025. Aktiviteti mblodhi kuajt kampionë nga të gjitha trevat shqiptare, duke krijuar një atmosferë festive, sportive dhe të mbushur me emocione.

Gara u shndërrua në një simbol të identitetit, traditës dhe krenarisë shqiptare, ku garues nga Shqipëria, Kosova, Maqedonia e Veriut dhe Lugina e Preshevës rivalizuan me profesionalizëm dhe shpirt të lartë garues. Publiku i pranishëm ndoqi tre disiplina garuese, duke përjetuar një spektakël të vërtetë hipizmi.

Rezultatet zyrtare të garave

Gara me kuaj anglez – 2000 m

Xhamparino – Kodra e Kuajve

Ago – Lugina e Preshevës (Dashnim Osmani)

Xhonavar – Vllaznia Hipizëm Shkodër

Gara me kuaj arab – 3000 m

Albino – Flori Oficial

Lacrim – Zhaklin Shahini

Eos – Ferma Kallbaqi

Gara me kuaj anglo-arab – 3000 m

Luna – Besnik Shkrela, Fier

Eos Jr – Arsid Moriqi, Shkodër

Anabela – Meldis Barbullushi, Shkodër

Organizimi i garës u mundësua falë punës së Komisionit Organizativ, të përbërë nga Indrit Plangaj, Admir Bibaj dhe Behar Saliu, si dhe mbështetjes së rëndësishme financiare e logjistike të Klubit të Hipizmit “Kalorësit Illyrian”, nën drejtimin e presidentit Attin Amadeus Doshi.

Në përfundim, organizatorët shprehën mirënjohjen për të gjithë garuesit, klubet pjesëmarrëse dhe publikun e zjarrtë që e shndërruan këtë ditë në një festë madhështore të hipizmit shqiptar.