Në pritje të restaurimit, ‘Nënë
Tereza’ lihet në oborrin e një banese

TIRANE- “A1 Report” zbulon vendin ku mbahet monumenti “Nënë Tereza” i skulptorit kosovar Luan Mulliqi. Në oborrin e një banese përdhese në rrugën “Komuna e Parisit” në kryeqytet, është lënë monumenti i Nënë Terezës, i zhvendosur pas 7 vjetësh qëndrimi në hyrje të aeroportit që mban emrin e shenjtores.
 
Monumenti 6 metra i lartë i skulptorit kosovar Luan Mulliqi, u vendos në Rinas në 13 shtator të vitit 2007. Ka një formë antigravitive, që del nga toka, apo që mbin si një lule dhe që hapet për të paraqitur gjithë veprimtarinë e Nënë Terezës, dhe pastaj merr formën e një shigjete që priret nga qielli, nga përjetësia.
 
Monumenti është hequr të shtunën e javës së kaluar në Rinas, për t’u zëvendësuar nga monumenti tjetër i Nënë Terezës, i cili ndodhej tek Korpusi Universitar, dhe është zhvendosur në kuadrin e restaurimit të sheshit me rastin e vizitës së Papës Françesku, e parashikuar për në 21 shtator.
 
Edhe kjo statujë është marrë në dorëzim nga Instituti i Restaurimit të Monumenteve, por për shkak të përmasave më të vogla ndodhet brenda ambienteve të këtij instituti.
 
Dy statujat do të restaurohen dhe janë parashikuar që në ditën e vizitës së Papës në Tiranë, të kenë ndryshuar vendet në formë rrokate nga Rinasi te Korpusi dhe anasjelltas.




Redaksia Online
(e.s/shqiptarja.com)