Mund të ishte një metaforë e kushedi se çfarë në një qytet të Europës: policitë kundër pianos. Por jo. Në qytetin tonë të dashur, në Tiranë, është realitet. Një realitet sa qesharak aq i trishtë dhe domethënës për perceptimin e gabuar e të deformuar që kemi arritur të krijojmë e të konceptojmë deri më tash të Shtetit, të respektimit të rregullave.
Rastësisht qëllova dëshmitare e një situate të pakëndshme: në Akademinë e vogël të baletit prej tri ditësh ka mbërritur një piano. Nga ora 16 deri në orën 20 ndonjë vogëlush që do të dëshirojë të marrë leksione, e ka këtë mundësi ta bëjë në orare të pranueshme e të lejueshme sipas ligjit. Akademia ndodhet në katin përdhes të një pallati ku ka një sërë aktivitetesh: bare, rrobaqepësi, minimarket, pastaj sipër zyra e akoma më sipër banesa. Askush në vite të tëra të akademisë nuk është ankuar asnjëherë për muzikën e magnetofonit që në nivele të pranueshme luhet për vogëlushët në këto orë të pasdites. Gjërat ndryshuan me mbërritjen e Pianos!
Që në ditën e parë të saj, me shtypjen e notës së parë, me interpretimin e fletës së parë të pentagramit forcat emergjente të policisë të thirrura në ndihmë nga fqinja e lyerjes së thonjve, ngjitur me Akademinë, mbërritën me shpejtësi. Ikën ata ditën e parë, për të mbërritur në ditën dytë forcat e Policisë Bashkiake. Ikën ata pasi panë dokumente e ligj te respektuar, për mbërritur vetë Policia e Shtetit ditën e tretë. Polici hap derën ndërsa bëhej leksion pa piano, duke kërkuar shkelësin. Mësuesja duhej të paraqitej në polici për të treguar para shefit të madh se ishte në rregull me ligjin. Polici që u fut nuk kishte kompetencë të shihte e të konstatonte se ç’ndodhte me pianon apo me shkelësit në fjalë.
Nuk duam të dekurajojmë më këtë dëshmi asnjë polici në kryerjen e detyrës dhe në shërbimin sa më dinjitoz ndaj ankesave të qytetarëve, por le të pranojmë se përditë jemi dëshmitarë se kjo polici, këto polici, me një zell të jashtëzakonshëm tregojnë forcën e tyre me të brishtët e shoqërisë dhe kjo është një rrugë tepër e gabuar.
Mendoni të gjitha pianot që ndodhen nëpër apartamentet e Tiranës si për qëllime arsimore ashtu dhe për shije personale. Mendoni dikush të marrë guximin të luajë një notë jo në orët normale të pasdites, si në Akademinë ku isha dëshmitare, por në një mbrëmjë familjare, në një moment krijues apo romanticizmi. Muzikantët duhet të presin vërshimin e të gjitha policive në shuarje të pianos?
Kjo që po shkruaj nuk është një kapriço dhe as snobizëm. Fakti që denoncimi i tretë i gruas së thonjve ishte bërë, sipas policit, në 18.30 të së martës, dhe polici mbërriti me shpejtësinë e erës, pavarësisht mbipeshës, para orës 19.00 të së njëtës ditë duke ndërprerë një orë mësim baleti, tregon se asgjë nuk është në fokusin e duhur nga njerëzit e rendit.
Si qytetarë apo gazetarë përditë jemi dëshmitarë të tolerimeve deri në çmenduri të aktivitetesh të zhurmshme dhe të jashtë çdo norme volumi vetëm sepse janë pronë apo administrim prej të fortish apo njerëz pushteti. Përditë sinjalizohemi se të gjitha policitë nuk i dëgjojnë aspak shqetësimet reale të qytetarëve, kur bëhet fjalë për dhunim të vërtetë akustik dhe të të drejtave të një jetese harmonike dhe normale, por mobilizohen për “mbylljen e gojës” së një pianoje.
Kjo nuk është polici e një qyteti, është policia e të fortëve apo e parave të marra për të përkëdhelur egot e ziliqarëve apo shkatërruesve të gjërave të bukura të Tiranës, ku bën pjesë dhe një piano.
Komente
Lajme të tjera
-
Kukës/ Babai denoncon në Polici humbjen e djalit 17-vjeçar, nisin kërkimet dhe kontrollet për gjetjen
27 Nëntor, 15:39 -
Elbasan/ Tre aksidente me pasojë 6 të plagosur, në pranga shoferi 71-vjeçar, 2 nën procedim! Një nga të dëmtuarit fëmijë
27 Nëntor, 15:23 -
Tepelenë/ Përleshje pranë një prej gjimnazeve të qytetit, 2 të rinj konfliktohen me 4 nxënës! Policia procedon të rriturit, shkak motivet e dobëta
27 Nëntor, 14:39 -
Tropojë/ IMT i kapi duke ndërtuar pa leje në zonën turistike të Valbonës, Policia procedon 4 banorët
27 Nëntor, 13:40 -
Kukës/ U vetëplagos me armë në lokal, Policia arreston 19-vjeçarin e dëmtuar, pronarin dhe 3 të tjerë! Një i pestë në kërkim
27 Nëntor, 13:26 -
Vlorë/ U kap me makinë “Range Rover” të vjedhur në Itali, Policia procedon për trafik mjetesh 34-vjeçarin
27 Nëntor, 13:16 -
Korçë/ Arrestohet mësuesi i shkollës 9 vjeçare, akuzohet se i dërgonte mesazhe erotike në Whatapp dy nxënësve të tij 14 vjeçare! Denoncimi u bë nga të miturat
13 Nëntor, 12:10 -
Shisnin drogë në qytetin e Vlorës dhe të Fierit, 11 të arrestuar, 2 të tjerë në kërkim, një i mitur nën hetim! Si funksiononte organizata (EMRAT+VIDEO)
12 Nëntor, 13:39 -
Gjirokastër/ Zhvati 42 mijë euro nëpërmjet mashtrimit, 'Porosia' prangos 27-vjeçarin! Katër muaj hetime, i gjendet dhe armë
9 Nëntor, 12:45 -
Blushi akuza për arrestimin e Ilir Metës: Policia po ruan emrat e efektivëve që morën pjesë në Operacion, iu mohua edhe avokati
7 Nëntor, 15:06 -
Gjirokastër/ I lidhën në mënyrë të paligjshme sahatin e energjisë një biznesi, procedohen penalisht 2 punonjësit e OSHEE-së!
7 Nëntor, 14:12 -
Pogradec/ I dehuri shkatërron parukerinë me sende të forta, Policia e shoqëron! Të panjohura motivet (VIDEO)
4 Nëntor, 21:28
Jam pa fjale. Ju lumte per kurajon dhe mbeshtetjen e njerezve te Kultures qe shtypen me shume deshire nga forca e “ligjit”
Përgjigju