TIRANË- Bashkëkryetari i Komisionit për Reformën Zgjedhore Damian Gjiknuri ka ftuar zyrtarisht Partinë Demokratike të marrë pjesë në komisionin e reformës zgjedhore që do të zhvillohet ditën e nesërme në orën 10 të paradites. Gjiknuri i ka drejtuar ftesën sekretarit për çështjet ligjore në PD, Ivi Kaso për të diskutuar mbi ecurinë e tryezës së 25 shtatorit të thirrur nga OSBE, por edhe veprimtarinë e mëtejshme të këtij komisioni.
Përgjigja nga selia blu ishte e menjëhershme , por refuzuese. Gazment Bardhi, e tha prerë se PD do t'i qëndrojë deklarimit publik që ka bërë në tryezën e organizuar nga OSBE.
Ndërkohë Gjiknuri tha për Report TV se ky komision do bëjë çmos për të realizuar Reformën Zgjedhore në kohë.
![](https://shqiptarja.com/template/img/NO_ALFA_Kuadrate shqiptarja.png)
“Do bëjmë çmos për ta realizuar në kohë, duke e ndarë procesin në dy faza. Do adresojmë sa më shpejt rekomandimet e OSBE-ODHIR ndërsa pjesën tjetër që kërkon më shumë kohë si sistemi dhe çështja e votës së emigrantëve mund ta lëmë një një fazë të dytë pas dhjetorit”, tha Gjiknuri.
Kjo mbledhje vjen pas tryezës së thirrur nga OSBE, ku e pranishme ishte edhe opozita parlamentare, në të cilën propozoi ngritjen e një strukture të posaçme edhe me prani ndërkombëtare për këtë reformë.
Reforma zgjedhore është një nga dy kushtet e Gjermanisë për nisjen e negociatave dhe kryeministri Edi Rama i shtriu edhe njëherë dorën për dialog opozitës. Por Lulzim Basha i vendosi kushte. Pesë pikat e dërguara nga opozita për zgjidhjen e krizës politike, kanë në thelb Reformën Zgjedhore.
Përveç kushtit për largimin e Gjiknurit nga drejtimi i Komisionit për Reformën Zgjedhore tashmë opozita joparlamentare kërkon edhe largimin e Rudina Hajdarit si përfaqësuese e opozitës së re nga bashkëdrejtimi i këtij komisioni.
Por kryeministri Rama deklaroi se reforma zgjedhore është kusht për negociatat dhe koha nuk pret prandaj shumica do të miratojë draftin sipas rekomandimeve të OSBE-së. Drafti i PS-së së 2018 që pranon kushtet kryesore të PD-së dhe OSBE-ODIHR-it.
![](https://shqiptarja.com/template/img/antipiracynote.jpg)
![](https://www.shqiptarja.com/template/img/sh_logo1.png)