Përplasja në PD/ Bardhi kërkon në Gjykatë çregjistrimin e Bashës si kryetar! Grupi i PD: Të anulohen zgjedhjet, akt përçarës

Partia Demokratike zhvillon nesër zgjedhjet për Kryetar. Zëdhënësja e Grupit Parlamentar të PD-së, Orjola Pampuri ka “rrëzuar” vendimin e sekretarit të përgjithshëm, Gazment Bardhi, për anulimin e këtij procesi, duke theksuar se deklarata në emër të grupit parlamentar, pa dijeninë anëtarëve, nuk gëzojnë vërtetësi. Ajo shkruan se reagimet e Bardhit janë shfryrje mllefesh. 

“Si Zëdhënëse e Grupit Parlamentar të Partisë Demokratike, dua të theksoj se;

Deklarata në emër të grupit parlamentar, pa dijeninë anëtarëve të grupit nuk gëzojnë vërtetësi.

Nxitimin për të ndërmarrë hapa antistatutorë nuk ndihmon askënd, dhe nuk e legjitimon asnjë vendim. Kjo duhet të marrë fund. Individualisht deputetë të grupit mund të shprehin mendime e qëndrime, por të flitet në emër të grupit, pa pjesëmarrjen e të gjithë deputetëve është e tepërt.

Nesër, Partia Demokratike ka zgjedhje dhe ky është një vendim i miratuar nga kryesia dhe këshilli kombëtar, mendimet dhe qëndrimet kundër mbajnë emër dhe mbiemër të çdo deputeti, por mllefet kolektive, nuk mund t’i atribuohen grupit parlamentar.

Partia Demokratike është e demokratëve, deputetët janë njerëz me dinjitet e integritet, dhe në asnjë moment nuk mund të shndërrohen në tabele qitje për të shfryrë mllefet e frustrimet e brendshme të askujt, apo për të mbrojtur interesat personalë të dikujt”- tha Pampuri.

Deputeti demokrat Kreshnik Çollaku ka reaguar pa deklaratës së grupit të PD, në të cilën kërkohet anulimi i zgjedhjeve për kreun e ri. Çollaku shkruan se nuk është etike që grupi i PD të bëjë deklarata në emër të të gjithë deputetëve, kur jo të gjithë ndajnë  të njëjtin mendim për zgjedhjet në PD.

“Keqpërdorimi i deklaratave në emër të Grupit Parlamentar duhet të ndalet. Në Grupin Parlamentar bëjmë pjesë të gjithë deputetët e PD. Është fakt i njohur se brenda grupit për çështje te caktuara, që lidhen me zgjedhjet ne PD ndajmë mendime e qëndrime te ndryshme.

Është krejt normale qe kolege deputete individualisht apo ne grup nominalisht mund te shprehin qëndrimet e tyre. Është jo korrekte dhe jo etike qe ne emër te Grupit te dalin deklarata qe nuk përfaqësojnë gjithë grupin e që për më tepër nuk janë as diskutuar me të gjithë grupin.

Duke qene se kjo po behet një sjellje rutine e përsëritur, ju bej apel kolegeve ti bëjnë te tilla deklarata ne emër personal dhe jo ne emër te gjithë Grupit Parlamentar te PD, si kusht për të ruajtur respektin reciprok dhe kohezionin e Grupit”, shkruan Çollaku.

Pasi dorëzimit në gjykatë të kërkesës për të çregjistruar Lulzim Bashën si kryetar i PD nga regjistri i partive politike, grupi parlamentar i Partisë Demokratike i ka bërë thirrje Lulzim Bashës dhe grupi të tij që të heqin dorë nga zgjedhjet që do të mbajnë ditën e nesërme duke thënë se është një akt përçarës. Në deklaratën e grupit të PD, thuhet se duhet të respektohet vendimi i Këshillit Kombëatr nga çdo anëtar dhe funksionar i partisë.

"Grupi Parlamentar i Partisë Demokratike apelon për maturi, për ofrimin e zgjidhjeve dhe jo thellimin e përçarjes; forcimin e partisë dhe jo shndërrimin e saj një parti familjare; respektimin e vendimit të Këshillit Kombëtar të Partisë Demokratike dhe jo rrugë antistatutore që kanë treguar që nuk të çojnë askund përveçse mbajnë nën konflikt permanent PD dhe forcojnë Edi Ramën. Dje Këshilli Kombëtar i PD, organi më i lart vendimmarrës në PD, ka vendosur anulimin e datës 29 Korrik për zgjedhjet e kryetarit të PD. Ky vendim është i detyrueshëm për çdo anëtar të PD dhe për çdo funksionar të saj.

Por nesër Lulzim Basha ka lajmëruar një akt përçarës të Partisë Demokratike. Interesi i demokratëve është lufta e të gjithëve bashkë, kundër Edi Ramës. Interesi i Lulzim Bashës po duket që është përçarja, zvogëlimi, lufta dhe armiqësia mes demokratëve dhe ndërtimi i një partie personale, që i shërben vetëm interesit të tij personal.

Në vijim të ndërtimit të një partie personale, nesër sipas tij do të zgjidhet Kryetari i Partisë. Qartësisht ajo që po bën Lulzim Basha nuk ka lidhje me Partinë Demokratike. Këshilli Kombëtar i PD në detyrë, funksional, i regjistruar në gjykatë dhe me mandat që i përfundon më 17 Korrik 2025, ka vendosur me vendimin e datës 27 Korrik 2023 anullimin e zgjedhjeve. Proceset antistatutore, nuk janë asgjë tjetër, vetëm një akt turpi për të dëmtuar PD, për të mbajtur gjallë ndasitë mes demokratëve dhe për të shfokusuar PD nga beteja me regjimin e Edi Ramës", thuhet në deklaratë. 

Sekretari Ligjor i Partisë Demokratike Indrit Sefa ka reaguar pas vendimit të grupimit të Gazmend Bardhit për të depoziuar në gjykatë të gjitha vendimet e Këshillit Kombëtar të PD të mbajtuar një ditë më parë. Duke ironizuar mbledhjen e Këshillit Kombëtar, Sefa tha se i urojnë suksese Partisë së parë digjitale në Shqipëri.

‘Atyre që braktisin forumet e PD dhe i shërbejnë interesave personale të Sali Berishes, i urojmë suksese në iniciativën për të dorëzuar në gjykatë vullnetin e mbledhjes se parë të Partisë  së parë digjitale në Shqipëri. Nesër demokratët do të votojnë për kryetarin e ri të PD. Procesi legjitim i zgjedhjes së kryetarit do të pasohet me riorganizimin vital të Partisë, për ta bërë PD alternativë qeverisëse për Shqipërinë dhe shqiptarët.’- tha Sefa.