Ngërçi në KQZ, Moisiu: Të
ndërhyjë Presidenti Nishani

TIRANE- Ish-presidenti Alfred Moisiu i ka bërë apel presidentit në detyrë Bujar Nishani, të mbledhë krerët e partive politike për të zgjidhur ngërçin që ka kapluar KQZ-në.
 
“Në qoftë se vërtet do ta lënë KQZ në këtë mënyrë, atëherë nuk e di se kush do t’i certifikojë zgjedhjet sepse këtë punë nuk mund ta bëjë kolegji zgjedhor dhe në një intervistë që dhashë te “A1 Report”, unë thashë që Kolegji Zgjedhor duhet që vendimet që merren me shumicë të cilësuar në KQZ, duhet t’i refuzojë, jo të merret me to, se s’ka të drejtë të merret. Po bën shkelje ligjore që merret me to”, tha ish-presidenti Moisiu.
 
Ndërsa vijoi “Ato janë veprime administrative dhe nuk mund të hyjnë në kanale gjyqësore, pa kaluar periudhën e duhur të pjekjes administrative. Presidenti duhet të ndërhyjë se s’bën. Duhet të kontaktojë me kryetarët e forcave politike e të bisedojë me ta seriozisht”.
 
Ish-kreu i shtetit tha më tej se përgjegjësinë për krijimin e kësaj situate e kanë të dy palët politikë, ndërsa e ka cilësuar vendimin e mazhorancës për shkarkimin e Muhos antiligjor dhe të dhunshëm.
 
“Unë ngarkoj me përgjegjësi të dyja forcat politike kryesore edhe mazhorancën edhe opozitën, por sigurisht që përgjegjësinë më të madhe e ka mazhoranca për vetë faktin se mënyra e shkarkimit të Muhos ka qenë një gjë që nuk mund të argumentohet në mënyrë ligjore në asnjë mënyrë. Ndërsa shkarkimi i Muhos ishte i dhunshëm”, u shpreh ish-presidenti Moisiu.

Redaksia Online
(e.s/shqiptarja.com)

TAG:
• kqz