Krishti u ngjall! Besimtarët katolikë festojnë Pashkën, Imzot Arjan Dodaj: Në një botë të hutuar, me shumë luftëra, kjo festë është ajo që ndryshon gjithçka

Besimtarët katolikë në Lushnjë kremtuan mbrëmë Pashkën. Mesha në kishën Shën Pjetri e Pali u drejtua nga Don Marku e Don John.

Ndërkohë edhe mëngjesin e sotëm besimtarët morën pjesë në ritin tradicional të festimit të ngjalljes së Krishtit.

Me qirinj në duar ata uruan dhe përcollën mesazhe paqeje dhe harmonie.

Pashka Katolike është kremtuar edhe në Vaun e Dejës, në Shkodër.

Mesha e Pashkës katolike është mbajtur në katedralen “Nënë Tereza”, dioqeza e Sapës.

Me dhjetëra besimtarë katolikë morën pjesë në meshë, ku shkëmbyen urime, bënë lutje dhe shkëmbyen apo thyen vezë të lyera me ngjyrë të kuqe.

Dita e Pashëve konsiderohet si një nga festat më të rëndësishme të kalendarit katolik.

Pashka, festa e shpresës dhe ringjalljes, u kremtua edhe në Lezhë. Me qirinj të ndezur në duar, simbol i dritës hyjnore, qindra besimtarë iu bashkuan ritualit fetar të mbrëmjes të së shtunës në Katedralen e “Shën Nikollit”.

Mesha e shenjtë e Ringjalljes u drejtua nga ipeshkvi i Dioqezës së Lezhës, Imzot Otavio Vitale, i cili në fjalën e tij theksoi rëndësinë shpirtërore të kësaj nate, duke e përshkruar si momentin kur besimi triumfon mbi mëkatin. Sipas tij, Pashka na fton të jetojmë me gëzim, paqe dhe besim.

Pas përfundimit të meshës, pas mesnate, besimtarët u larguan nga katedralja duke mbajtur me vete dritën e shpresës dhe urimin e lashtë: “Krishti u ringjall”.

Besimtarët katolikë në Fushë-Arrëz kremtuan Pashkën e Madhe.

Mesnata solli për besimtarët lajmin e gëzuar se “Krishti u ringjall”.

Urimet e përcjella nga besimtarët, ishin për dashuri, paqe e solidaritet mes njëri-tjetrit.

Besimtarët katolikë të qarkut të Beratit kanë kremtuar mesnatën e djeshme festën e shenjtë të Pashkës.

Rreth 300 familje katolike nga qytetet e Beratit dhe Kuçovës u mblodhën në Kishën “San Luca” në Kuçovë, ku u mbajt Mesha e Shenjtë e Pashkëve, ceremonia më e rëndësishme në kalendarin e krishterë, që simbolizon ringjalljen e Krishtit.

Mesha u drejtua nga prifti Giuseppe Tossi, i cili udhëhoqi lutjet sipas traditës dhe liturgjisë së kësaj feste, duke përcjellë mesazhe shprese, paqeje dhe besimi.

Në mesnatë, besimtarët pritën me emocion lajmin e madh “Krishti u ringjall”, duke e shoqëruar atë me lutje dhe reflektim për një botë më të mirë.

Ceremonia u ndoq me përkushtim nga të pranishmit, të cilët u lutën për paqe, mirëqenie dhe harmoni në familjet e tyre.

Në përfundim të meshës, besimtarët shkëmbyen urime me njëri-tjetrin, duke përcjellë mesazhe dashurie dhe solidariteti për të gjithë besimtarët katolikë.

Besimtarët katolikë kanë marrë pjesë në meshën e shenjtë të vigjiljes së Pashkës në kishat e të gjithë rrethit të Krujës.

Mesha e shenjtë e vigjiljes u zhvillua sipas traditës së hershme, ku fillimisht u ndez drita e qiririt të kishës, ceremoni kjo që u mbajt në oborrin e kishave ku ishte ndezur një zjarr i madh nga ku u mora flaka për qiririn e kishës e prej tij u ndezën të gjithë qirinjtë e besimtarëve, të cilët kremtojnë ringjalljen e Krishtit.

Vigjilja e Pashkës këtë vit nisi nga fshati Kryezi, aty ku u kremtua mesha e parë e kësaj feste të shenjtë në vendin tonë.

Drita e Krishtit, e shpërndarë nga famullitari i zonës, Frat Andreas Walterman, ndezi në zemrat e besimtarëve dritën e shpresës.

“Feja dhe shpresa janë dhurata të Krishtit për ne njerëzit. Pa shpresë nuk ka jetë, nuk ka të ardhme, nuk ka përparim dhe zhvillim”, u shpreh kreu i Kishës Katolike në zonën e Fushë-Arrëzit.

Pashkët na ftojnë të ndryshojmë realitetin tonë pesimist dhe të besojmë në një fillim të ri. Edhe pse bota sot po përballet me shumë vuajtje, e njëjta situatë reflektohet edhe në zonën tonë.

“Le të jetojmë me shpresë, ashtu siç na fton Pashka”, theksoi prifti katolik.