Protesta e opozitës/ Meta i jep merita Kryemadhit e Bashës, e quan Ramën armik të dialogut

Presidenti Ilir Meta ka bërë një reagim përmes rrjeteve sociale, në nisje të protestës së dhjetë të opozitës joparlamentare kundër qeverisë. Teksa mbështet kauzën e tyre kundër zgjedhjeve socialiste të 30 qershorit sic ai i quan, Meta bën thirrje që protesta të jetë paqësore. Ndër rreshta, Meta jep edhe një përgjigje për kryeministrin Edi Rama, i cili sot në Kuvend e quajti armik të hershëm të mazhorancës, në seancën plenare ku u votua ngritja e komisionit hetimor për shkarkimin e Metës. Ky i fundit e quan Ramën armik të betuar të dialogut.

Kreu i shtetit falenderon shqiptarët që nuk morën pjesë në votimet farsë sipas tij të 30 qershorit, dhe meritën për këtë ja jep drejtuesve të opozitës, Lulzim Bashës kreut të PD-së dhe Monika Kryemadhit, kryetares së LSI-së, bashkëshorte e Metës. 

Reagimi i Metës

Të dashur qytetarë!

Ndërsa drejtuesit e Opozitës së Bashkuar ju kanë ftuar sot në një protestë kombëtare kundër votimeve socialiste të 30 qershorit, dua të përshëndes mbi 85% të qytetarëve, të cilët bojkotuan një proces "fake", më të shëmtuarin që mund të ndodhte në kontinentin tonë të civilizuar, pas 3 dekadash që kur vendi ynë u nda nga regjimi më shtypës i të drejtave të njeriut që njohu e gjithë Europa ish-komuniste.

Ndaj një mirënjohje të gjithë shqiptarëve, të cilët bojkotuan farsën më të turpshme që mund të bënte vendi në këto momente kur klasa politike duhet të tregonte përgjegjësi dhe vizion europian.

Për këtë ka meritë dhe distancimi i prerë dhe i qartë i lidershipit tuaj, nga çdo akt dhune në dy javët e fundit që ndihmoi shumicën dërmuese të shoqërisë tonë për të identifikuar armikun e betuar të dialogut në këto 6 vite në vendin tonë, i cili ka mbijetuar vetëm përmes diversionit, përçarjes së opozitës, blerjes së zgjedhjeve përmes aktivizimit të "çunave problematikë" dhe lobingjeve të shfrenuara për t'i mbyllur sytë gjithë botës për të mos parë një maskaradë të gjithanshme, që kulmoi me të Dielën e Fitorjeve, plot tejkalime të shfrenuara.

Ndaj ju ftoj të vazhdoni të protestoni vetëm paqësisht, për ta bërë kauzën tuaj edhe kauzën e shumicës së atyre që u detyruan të merrnin pjesë në farsën e 30 qershorit.

Nga ky test shumë i rëndë ku u provokua demokracia jonë dhe bashkëjetesa qytetare, kjo kauzë i ka të gjitha mundësitë për të dalë shumë më e fortë vetëm përmes rezistencës qytetare dhe paqësore.

Ju lutem dhe për sa më pak zhurmë sot, në respekt të organizatës socialiste në KQZ, që po punon ditë e natë të përputhë rezultatet, me tejkalimet e shfrenuara që vazhdojnë çdo moment.

G.M./b.ha./Shqiptarja.com

TAG:
• Ilir Meta
• protesta e 8 korrikut