Nuk ka zgjidhje për presidentin e Kosovës, opozita bojkoton sërish Kuvendin! Dy kandidaturat e reja të Vetëvendosjes votohen me 64 deputetë

Ka nisur votimi në Kuvendin e Kosovës për dy kandidatet për presidente të Kosovës: Feride Rushiti dhe Hatixhe Hoxha. Në seancë gjenden 64 deputetë, ndërsa mungojnë deputetët e opozitës. Duhen të paktën 80 deputetë të marrin pjesë në votim. 

Komisioni për legjislacion shqyrtoi dokumentacionin e dy kandidateve dhe  konstatoi se mund të hidhen në votim.

Votimi për president bëhet me votim të fshehtë. Në raundin e parë dhe të dytë kërkohen dy të tretat e votave, ndërkaq në raundin e tretë kërkohen 61 vota për president.

Nëse nuk marrin votat e nevojshme, shpërndahet Kuvendi dhe vendi shkon në zgjedhje.

Lëvizja Vetëvendosje ka propozuar dy kandidatura të reja për postin e Presidentit të Kosovës.

Njoftimi është bërë nga kryetarja e Kuvendit, Albulena Haxhiu, e cila shkruan në rrjetet sociale se propozimet janë Feride Rushiti dhe Hatixhe Hoxha.

Rushiti është themeluese dhe udhëheqëse e Qendrës Kosovare për Rehabilitimin e të Mbijetuarve të Torturës (QKRMT), e cila së bashku me qendrën e saj më 2025 u nominua për Çmimin Nobel për Paqe nga një ligjvënës suedez. Më 2018, Rushiti u nderua me Çmim për Guximin e Gruas të ndarë nga sekretari amerikan i Shtetit.

Hatixhe Hoxha është aktiviste për të drejtat e njeriut dhe në të kaluarën ka qenë ligjvënëse në Kuvendin e Kosovës. Ajo është drejtoreshë e shoqatës AUTIZMI. Deri më 2007, për dy mandate, Hatixhe Hoxha ishte deputete e Kuvendit të Kosovës nga radhët e PDK-së, ndërkaq LVV-së i ishte bashkuar më 2010, parti me të cilën kishte garuar për deputete. Ajo po ashtu ka qenë pedagoge në Universitetin e Prishtinës më 2002-2003, në Fakultetin e Arteve.

Glauk Konjufca, i propozuar aktual për president, është tërhequr zyrtarisht nga kandidatura.

“Tërhiqem në mënyrë formale nga kandidatura për president të Republikës së Kosovës”, tha Konjufca.

Veprimin e tij e pasoi edhe deputetja Fatime Mulhaxha Kollçaku, kandidatja e dytë e propozuar për presidente nga LVV-ja.

“Edhe unë tërhiqem, e thashë që t’i japim mundësi zgjidhjes së problemet sepse zgjedhjet nuk janë zgjidhje, sot tërhiqem përfundimisht nga kandidatura”, tha Mulhaxha Kollçaku.

Ministri i Punëve të Jashtme dhe Diasporës, Glauk Konjufca, tha para Kuvendit të Kosovës se kriza e zgjedhjes së presidentit po i bën dëm Kosovës në arenën ndërkombëtare. Sipas tij, ndërkombëtarët nuk i kuptojnë arsyet dhe kjo e bën vendin të duket i dobët dhe i paaftë të ndërtojë institucionet.

“Po i bëhet një dëm shumë i madh dhe serioz Kosovës. Prej vështrimit tonë të brendshëm, demokracisë vibrante, mund të shihet prej një aspekti pozitiv që kemi krijuar një shtet që përballon paqëndrueshmëritë, por ky nuk është kontribut i asnjë partie, kanë kontribuar breza të tërë. Është amaneti i dëshmorëve në fund të fundit. Në planin ndërkombëtar, dëmi është katastrofal. Në çdo takim, pyetja e parë është ç’po ndodh me krizën në Kosovë? Pse nuk po e zgjidhni presidentin? Nuk i kuptojnë arsyet, për ta është e pakonceptueshme. Kjo ka dëm të madh sepse Kosova fillon të konceptohet si një shtet që ka probleme serioze në ndërtimin e institucioneve të veta. Unë nuk di çfarë kuptimi ka ky qëllim që Kosova të duket si shtet i dobët, me qeveri me legjitimitet me probleme, me sfida, pa parlament. Në imagjinatën e kujt është kjo?”, përfundoi Konjufca.

Zëvendëskryeministri i Kosovës Glauk Konjufca tha se opozita po shfrytëzon krizën për zgjedhjen e presidentit me qëllimin për të rrëzuar qeverinë.

“Duan ta shfrytëzojnë çështjen e presidentit që përmes pamundësimit të kuorumit të çojë në zgjedhje. Shpresa e tyre që përmes shfrytëzimit të institucionit të Presidentit, të rrëzojnë qeverinë. Kjo, i bie që të shkosh shumë larg në betejën politike, për të shfrytëzuar pozitën më të lartë për të rrëzuar qeverinë dhe kryeministrin”, tha Konjufca.

Më tej, Konjufca u shpreh se opozita është e vetëdijshme që në zgjedhje, LVV të pësojë humbje të thellë. Sipas tij, arsyeja është nihilizmi politik që do të prodhojë pasoja të paparashikueshme.

“A thua që gjithë këto parti politike presin që nesër kur të mbahen zgjedhjet, LVV të ketë 13% e këta 51%? A thua mendojnë ata që për 4 muaj ajo që është kështu, kthehet kështu? (Bën gjeste me duar) Unë për vete, s’besoj që ata besojnë në këtë. A kanë sondazhe dhe të dhëna më objektive? Kanë sondazhe, i kanë informatat e sakta dhe si është e mundur që t’i dinë krejt parametrat e situatës dhe prapë të bëjnë të njëjtën gjë? Arsyeja më e fundit mua më del një nihilizëm politik shumë fatkeq për Kosovën, me pasoja që s’mund t’i parashikojmë tani për tani", tha zv/kryeministri.

Dështimi për të zgjedhur presidentin e ri të Kosovës, do të bëjë që deri më 4 tetor, Albulena Haxhiu të mbajë këtë detyrë që më pas do t’i kalojë kryetarit/es të ri të Kuvendit, u shpreh Albin Kurti para Kuvendit. Kjo nuk do të ndryshonte asgjë për opozitën, vijoi ai, sepse sërish Vetëvendosjes do t’i mbeteshin 3 pozita: e Presidentit, Kryeministrit dhe Kryetarit të Kuvendit.

“Aman na ndihmoni të mos kemi 3 pozita! Të dashur deputetë të opozitës, ejani na ndihmoni të mos kemi 3 pozita se tashmë i kemi 3 pozita!”, iu drejtua Kurti opozitës.

Kryeministri Albin Kurti tha se as përpjekjet e fundit të LVV kundrejt opozitës për çështjen e presidentit, nuk kanë prodhuar fryte.

“Mbrëmë kemi ripërsëritur ftesën dhe sërish asnjë përgjigje pozitive. Krerët e PDK dhe LDK bëjnë deklarata në media, por asnjë emër konsensual nuk erdhi as privatisht e as publikisht. Kjo e meriton një shpjegim. Nëse oferta jonë nuk do të ishte e mjaftueshme, do të kishte kërkesa”, tha Kurti.

Sipas tij, problemi që ndodh nga kjo është mosrespektimi i rezultatit të zgjedhjeve ku Vetëvendosja doli fituese.

“Problem është që nuk ka respekt ndaj verdiktit të popullit. Nuk po respektohet rezultati i zgjedhjeve. Njësoj si vitin e kaluar, qëllimi është që të dëmtohet Vetëvendosja si fituese, që të ketë sa më pak mandate dhe Kosova të mos duket si vend stabël institucional”, tha Kurti.

Kurti tha se deri në momentin e fundit, LVV “ka pritur bashkëpunim e marrëveshje” nga ana e opozitës për çështjen e presidentit të Kosovës. Por, ai nënvizoi se çdo iniciativë për takimet është ndërmarrë prej tij dhe nga opozita s’ka pasur asnjë përpjekje.

“LDK dhe PDK nuk ka marrë iniciativë, ndonjë propozim, ndonjë emër. Kur iu ofrua mundësia konkrete, kanë zgjedhur heshtjen. Fakti që opozita nuk ka marrë asnjë iniciativë për zgjedhjen e presidentit është dëshmi e qartë e dështimit të marrjes së përgjegjësisë proporcionale”, tha Kurti.

Në fjalimin e tij para deputetëve të Vetëvendosjes Kurti akuzoi opozitën se nuk ka respektuar rezultatin e zgjedhjeve, duke ngatërruar kompromisin me nënshtrimin

“Rezultati i zgjedhjeve nuk mjafton vetëm të pranohet, rezultati i zgjedhjeve duhet të respektohet dhe respektimi i rezultatit nuk është nënshtrim, një term tjetër i keqpërdorur nga opozita në këtë sallë e jashtë saj. Nëse ka një nënshtrim, ai është ndaj verdiktit të qytetarëve, të cilët me votë kanë përcaktuar peshën e cilit subjekt politik, duke përcaktuar edhe sjelljen parlamentare. Pikërisht për shkak të keqkuptimit të fjalës “nënshtrim”, opozita kompromisin e kupton si nënshtrim të fituesit të zgjedhjeve. Kompromisi është marrëveshje që reflekton realitetin e mandatit zgjedhor duke u dhënë të tjerëve atë që u takon sipas peshës së tyre elektorale. Kompromisi i vërtetë, ai i cili u shërbën qytetarëve ndërtohet mbi dy shtylla të panegocioueshme, së pari mbi respektin për rezultatin e zjedhjeve, pra respektin e vullnetit të qytetarëve dhe peshës politike që ata i kanë dhënë secilit subjekt subjekt politik dhe së dyti mbi përgjegjësinë institucionale dhe demokratike e cila rrjedhë nga angazhimi publik dhe nga fakti se je përfaqësues i zgjedhur i popullit”, tha ai.

Kryetarja e Kuvendit të Kosovës, Albulena Haxhiu, tha se mungesa e opozitës në seancën e jashtëzakonshme për presidentin prodhon pasoja direkte dhe shtyn vendin drejt një krize të panevojshme.

“Mungesa e opozitës është një veprim që prodhon pasoja direkte, bllokimin e një procedure kushtetuese dhe shtyrjen e vendit drejt një krize të panevojshme. Aktgjykimi i Gjykatës Kushtetuese e ka sqaruar këtë çështje në mënyrë përfundimtare, deputetët janë të obliguar që të jenë të pranishëm dhe të votojnë, përveç rasteve kur kanë marrë leje të rregullt paraprake”, tha Haxhiu.

Nga salla e boshatisur e Kuvendit të Kosovës, kryeministri Albin Kurti tha se dështimi në zgjedhjen e presidentit është për faj të opozitës dhe kësisoj po e çon vendin drejt zgjedhjeve të reja

"Sot kemi mbërritur në fund të afatit kushtetues për zgjedhjen e presidentit të Republikës. Zgjedhja e presidentit është vendimtare për vazhdimin e funksionimit me kapacitete të plota të qeverisë, të Kuvendit dhe të institucionit të presidentit. Dështimi në zgjedhjen e presidentit e çon vendin në zgjedhje të reja që do të ishin të pestat me radhë prej 16 muajve. Pra pothuajse çdo stinë të vitit do të kishim zgjedhje. Zgjedhjet e reja do të frenojnë punën e Qeverisë.. Akuzat se VV ikën nga përgjegjësia nuk janë të vërteta. Nuk ka pasur as në mars të vitit 2021, as në shkurt të këtij viti, asnjë vonesë, asnjë ngurrim dhe asnjë shmangie në marrjen e përgjegjësive për të qeverisur. Kjo është e matshme dhe e verifikueshme.” tha Kurti

Shefja e grupit parlamentar të Lëvizja Vetëvendosje, Arbërie Nagavci, u ka bërë sërish thirrje partive opozitare që të marrin pjesë në seancën për zgjedhjen e presidentit në Kuvendi i Kosovës.

Në fjalën e saj në nisje të seancës, ajo theksoi se deri më tani nuk ka pasur asnjë nënshkrim apo propozim konkret nga opozita për emrat për president.

“Kuvendi është vendi ku duhet të diskutohen çështjet thelbësore për vendin dhe zgjedhja e presidentit nuk është çështje procedurale, por moment ku duhet të diskutohet për konsensus e vullnet politik. Kemi pritur për nënshkrimet e deputetëve të partive tjera, nuk kemi pranuar asnjë nënshkrim, asnjë diskutim lidhur me këtë çështje. Atëherë e kemi parë të nevojshme që të diskutojmë në këtë seancë”, u shpreh Nagavci.

Seanca për zgjedhjen e presidentit të Kosovës po vazhdon ndërkohë që opozita e ka bojkotuar atë.

Në sallë janë vetëm deputetët e Vetëvendosjes

Sipas vendimit të Kushtetueses, ka afat vetëm deri nesër që të zgjidhet presidentit i ri, në të kundërtën vendi shkon në zgjedhje të reja