Nisin regjistrimet për në çerdhe
afat deri në 1 korrik, ja dokumentat

Nisën ditën e hënë regjistrimet për në çerdhet e Tiranës. Deri në datën 1 korrik të gjithë prindërit kanë mundësi të aplikojnë për të regjistruar fëmijën e tyre në çerdhe.

Zhaneta Beqiri, drejtoresha e qendrës ekonomike të zhvillimit dhe edukimit të fëmijëve në Bashkinë e Tiranës thotë se këtë vit do të pranohen 2400 fëmijë në të gjitha çerdhet. Duke qenë se do të ketë shumë aplikime, ajo tregon se cilat do të jenë kategoritë prioritare.

"Në momentin e regjistrimit do respektohet  absolutisht  numri rendor që është  në aplikim  dhe do i jepet prioritet  disa kategorive  të prindërve që janë të punësuar, që nuk kanë mundësi që dikush  ti mbajë fëmijët  në shtëpi. Të prindërve që janë nëna kryefamiljare , të nënave vajza, familjet që janë në nevojë absolutisht është një shërbim publik dhe gjithmonë është në fokus politika sociale dhe fëmijët me nevoja të veçanta", shprehet Beqiri. 

Beqiri thotë se për të aplikuar duhet që të dorëzohet një certifikatë personale e fëmijës si dhe një vërtetim pune i nënës ose babait.

Ndërkohë Bashkia e Tiranës po shikon mundësinë që të marrë edhe disa ambiente me qira për çerdhe të reja, pasi ka kërkesa të shumta.

"Jemi duke parë në zonat ku ka dendësi më të madhe të banorëve  siç është njësia 5, njësia 6  në kombinat njësia 2 për të marrë ambiente çerdhesh me qira prandaj i filluam shpejt  me periudhën e aplikimeve  të shohim sa faktikisht  është nevoja për çerdhe  dhe gjatë këtij viti  do aplikojmë dhe çerdhet e reja  duke marrë ambiente me qira. Pavarësisht  se do jenë ambiente me qira  do jenë çerdhe që do kenë të gjithë infrastrukturën komfort standardeve", u shpreh Beqiri. 

Lista e fëmijëve që do të pranohen në çerdhe do të shpallet në fund të muajit korrik.

Redaksia Online
(M.Ç/shhqiptarja.com)