PS çel nesër fushatën, kryeministri Rama: Zgjedhjet në 30 qershor dhe pikë

Kryeministri Edi Rama është i prerë sa i përket datës së zgjedhjeve, duke artikuluar edhe një herë se zgjedhjet lokale do të mbahen në 30 qershor. Nëpëmjet një postimi ku njofton çeljen e fushatës elektorale më 1 qershor, Rama është shfaqur i vendosur se zgjedhjet nuk do të shtyhet.

"30 qershor dhe pikë", shkruan Rama, bashkangjitur fotos ku njofton hapjen e fushatës elektorale. Çelja e fushatës elektorale ishte parashikuar të mbahet ditën e sotme, më 31 maj, por duke qenë se opozita njoftoi zhvillimin e protestës së radhës kombëtare, PS vendosi shtyrjen e saj me një ditë më vonë.

"Post Scriptum: Meqë lajmëruat grumbullimin e radhës në 31 maj, shtabi ynë elektoral vendosi ta spostojë në 1 qershor mitingun e çeljes zyrtare të fushatës - kollaj, nuk ishte një datë si ajo zgjedhjeve që s’e kemi ne në dorë", njoftoi kryeministri Edi Rama në letrën e tij të pestë publike drejtuar kryedemokratit Lulzim Basha. Çelja e fushatës do të kryhet në parkun olimpik në Tiranë, në 16:00, siç bëri të ditur kryeministri Edi Rama. Burime për Report Tv bëjnë me dije për gazetaren Esion Konomi se ditën e nesërme, përveç kryeministrit Edi Rama, do të marrin fjalën kandidatët për Bashkinë e Fierit, Durrësit, Beratit dhe Shkodrës. Gjithashtu do të flasë edhe kryebashkiaku i Tiranës, Erion Veliaj.

Zgjedhjet e 30 qershorit do të zhvillohen pa pjesëmarrjen e opozitës, pasi këta të fundit dogjën mandatet dhe prej muajsh kanë nisur protestat ku kërkojnë një qeveri tranzitore pa kryeministër Edi Ramën, që do t'u mundësonte më pas zgjedhje të lira dhe të ndershme.

Nisur ky bojkot i opozitës, presidenti Meta është shfaqur i gatshëm që nëse do të ketë vullnet politik, të ndryshojë datën e zgjidhjeve, por shefi i qeverisë është shprehur se shtyrja e datës së zgjedhjeve është në shkelje të kushtetutës, për këtë arsye 30 qershori, sipas tij nuk do të lëvizë.
 

Postimi i kryeministrit Edi Rama

B.K./Shqiptarja.com

TAG:
• edi rama
• zgjedhjet lokale 2019