TIRANË - Kryeministri Edi Rama përgëzoi punën e policisë që ditën e djeshme arrestoi vëllezërit nga Elbasani, Klement dhe Eldi Çala, të dyshuar si organizatorë të grabitjes në aeroportin e Rinasit në 2019-ën.

Kreu i qeverisë përmes një video nga momentet e arrestimit të tyre, thotë se policia u sekuestroi 130 mijë euro dhe tre armë zjarri.  Shefi i mazhorancës thotë se krahas kontributit në përballimin e situatës me koronavirusin në Shqipëri, policia vijon betejën e saj për arrestimin e të kërkuarve.

"Dje Policia e Shtetit u hodhi prangat organizatorëve të grabitjes së aeroportit të Rinasit qershorin e shkuar dhe u konfiskoi 130 mijë € si edhe tre armë zjarri. Respekt për uniformat blu që krahas kontributit të jashtëzakonshëm në frontin e luftës me armikun e padukshëm, vijojnë betejën me llumin e kësaj dynjaje", shkruan Rama.

Klement dhe Eldi Çala u arrestuan dje në mëngjes në gjumë, në një vilë në Qesdarak të Kavajës, ndërsa akuzohen për një sërë grabitjes të ndodhura në rrugën e Rinasit dhe atë brenda aeroportit. Në video shihet se sa shumë kanë ndryshuar vëllezërit nga Elbasani, nga fotoja në të cilën ishim mësuar t'i shihnim, në atë që policia kishte publikuar kur ishin në kërkim. Të dy vëllezërit tashmë japin përshtypjen e "dy vëllezërve besimtarë muslimanë" pasi janë me mjekër.

Klement Cala

Eldi Cala