Presidenti Ilir Meta vijon që të jetë shumë i revoltuar me situatën politike në vend.

Pas skenës së paprecedentë që bëri mesditën e sotme, duke kërcënuar efektivët e policisë me burg dhe duke i nxjerrë jashtë nga zyrat e FRD-së, Meta ka publikuar një video nga mitingu i 2 marsit të vitit të kaluar.

Meta ka ndarë një video në rrjetet sociale, teksa po flet para qytetarëve shumë i entuziasmuar, teksa thotë: Kur populli ka frikë nga qeveria aty ka tirani. Kur qeveria ka frikë nga populli, aty ka LIRI, aty ka DREJTËSI.

 

Kujtojmë se ditën e sotme presidenti Ilir Meta është përfshirë në një rast të paprecedent, duke u përplasur me Policinë Bashkiake, e duke hyrë me forcë në zyrat e FRD-së. Kjo sepse sipas Metës, kërkesa e Bashkisë që FRD-ja të lirojë zyrat është me prapavijë politike.

Meta është përballur fizikisht me policët dhe zyrtarin e Bashkisë, madje edhe i ka kërcënuar ato duke i thënë që “të largohen ose do i çojë në burg me duart e tij”. Kreu i shtetit ka degjeneruar në një sjellje aspak të hijshme për një president për të mbrojtur zyrat e FRD-së, në një kohë kur vetë Sali Shehu përpiqet në një moment që ta qetësojë.