Nuk respektuan çmimin e Bordit, gjobiten 2 pika karburanti në Tiranë e Vlorë! Rama: Javën tjetër hyn në fuqi sekuestrimi i pikave të karburanteve

Dy pika karburanti, një në Tiranë dhe një në Vlorë janë gjobitur pasi nga kontrollet ka rezultuar se kanë vendosur çmim më të lartë sesa ai i përcaktuar nga Bordi Kombëtar i Administrimit të Karburanteve, 203 lekë.

Lajmi është bërë me dije nga kryeministri Edi Rama, i cili shkruan në ‘Facebook’ se të dy subjektet janë gjobitur me maksimumin ligjor. Kreu i qeverisë paralajmëron se nga java tjetër do të hyjë në fuqi sekuestrimi në vend i çdo pike karburanti që ngre qoftë edhe një qindarkë çmimin e shpallur paraprakisht nga Bordi i Administrimit.

“Sot janë kapur dy pika karburanti në Tiranë dhe Vlorë me faturime mbi çmimin e caktuar për të gjithë. Subjektet janë gjobitur me maksimumin ligjor. Duke nisur nga java tjetër do të hyjë në fuqi sekuestrimi në vend i çdo pike karburanti që ngre qoftë edhe një qindarkë çmimin e shpallur paraprakisht nga Bordi i Administrimit. Boll i ngre çmimet papushim kriza e shkaktuar nga lufta në Ukrainë, çdo ngritje për fitim në kurriz të popullit do të ndëshkohet, siç e kërkon kjo gjendje lufte në tregjet ndërkombëtare”, shkruan Rama.

LEXO EDHE:
Mero Baze: Beteja këmbëngulëse e Ramës ndaj një reportazhi të RAI

Më 16 mars Bordi Kombëtar i Administrimit të Karburanteve vendosi çmimin e naftës 203 lekë për litër deri më 21 mars. Bordi i Transparencës do mblidhet përsëri ditën e hënë, me qëllim pasqyrimin në çmimin e shitjes me pakicë të këtyre nënprodukteve, të ndryshimeve të mundshme të çmimeve në tregjet ndërkombëtare.

SI.E./Shqiptarja.com

TAG:
• rritja e cmimit të naftës
• edi rama