Organizimi i Euro U-21 së bashku me Serbinë, reagojnë TKZ: Kanë urrejtje për ne, s'kemi pse kapërcejmë Kosovën

Federata Shqiptare e Futbollit njoftoi se së bashku me Serbinë kanë aplikuar në UEFA për të mirëpritur së bashku Euro 2027 për moshat U-21. Organizimi i këtij eventi me Serbinë nuk është pritur mirë nga Tifozat Kuq e Zi, grupimi i Kombëtares.

TKZ flet për një tjetër skenar që anashkalon Kosovën. Sipas tyre Serbia ka aplikuar e vetme dhe duke qenë se nuk përmbush kushtet, FSHF i ka ardhur në ndihmë.

Në mesazhin e tyre, ultrasit e Kombëtares flasin për një anashkalim të Kosovës dhe për raportet e tensionuara mes serbëve dhe shqiptarëve. Jo pa shkak ata vënë theksin te banderolat fyesë që shfaqen në stadiumet e Serbisë, teksa shprehen se FSHF po "shet fytyrën". Në reagimin e tyre nuk mund të mos kujtoheshin krimet e serbëve karshi shqiptarëve.

Mesazhi i plotë i TKZ:

Lajmet për organizimin e Kampionatit Evropian të Shpresave (U21) 2027 nga Serbia kanë qarkulluar që në fillim të marsit 2024. Në këto lajme, njoftohet se Serbia aplikon e vetme për të organizuar këtë Evropian. Në të njejtat raportime te lajmit shkruhet se Serbisë “mund t’i kërkohet nga UEFA që ta organizojë kampionatin së bashku me Shqipërinë”.

Serbia, përveç krimeve dhe gjenocidit ndaj shqiptarëve është dënuar në disa raste nga UEFA për tifozët e saj racistë e të dhunshëm deri në vrasje. Sa për marrëdhëniet e drejtpërdrejta sportive të Shqipërisë me Serbinë pamjet, thirrjet, kriminale për therjen dhe vrasjen e shqiptarëve, goditjet ndaj lojtarëve tanë në 14 tetor 2014, dhe terrori ndaj delegacionit nuk besojmë se janë harruar. Njëlloj vazhdon përhapja e parullave të ngjashme nga tifozët serbë në ndeshje ku nuk janë aspak të perfshirë skuadrat shqiptare. Për asnjë nga këto nuk është kërkuar falje, përkundrazi kane luftuar edhe “sportivisht” kundër nesh deri në shkallët më të larta gjyqesore sportive.

Duke qenë se shpesh dhe me të drejtë sporti përdoret për të promovuar paqe, bashkëpunimin, mirëkuptim dhe shpresë do të duhej fallciteti, fasada, propaganda dhe në rastin më të mirë PR-i të organizohej dhe t’i “shiteshin” publikut pak më profesionalisht. Kështu që mirë do të ishte FSHF të tregojë nëse paraprakisht ka kërkuar të organizojë U21 Euro 2027 së bashku me Maqedoninë e Veriut, apo me Malin e Zi? Për sa kohë nuk përmbushim kërkesat teknike të mos shesim fytyrën dhe interesat etnike. Fqinjë kemi boll, skemi pse kapërcejmë Kosovën për ti dhënë ndihmë Serbisë.

Tifozat Kuq e Zi

1 Komb 1 Kombëtare 1 Kampionat Shqiptar

S.Dh/Shqiptarja.com

TAG:
• tkz
• uefa
• fshf