BRAZIL - Tetë tifozë të ekipit Corinthians janë vrarë në Sao Paulo në derbin e natës së mbrëmshme kundër Palmeiras. Lajmi u raportua nga mediet kryesore lokale.

Disa dëshmitarë flasin për dy persona të armatosur të cilët u futën në një lokal, shtrinë përtokë tifozët dhe pastaj i vranë ata duke i qëlluar në kokë. Masakra ndodhi në selinë e “Pavilhao 9″, një nga grupet e organizuara të tifozëve të Corinthiansve.

Policia tha se tre nga viktimat kishin të kaluar kriminale. Një person ka tentuar të ikë në rrugë, por u godit me armë zjarri dhe ra pranë një pike karburanti. Ai vdiq menjëherë pas dërgimit në spital.

Derbi përfaqëson një sfidë me rivalitet të fortë dhe në të kaluarën ka pasur shumë raste të dhunshme. Dy persona vdiqën në incidente përpara ndeshjes së marsit 2012, një viktimë u shënua një vit më herët dhe të tjera në vitet e mëparshme. Policia braziliane thotë ngjarja mund të jetë për larje hesapesh për drogë.

Ekipi i Corinthians publikoi një foto në "Twitter", në të cilën shkruhej "Luto", e cila përkthehet "zi" nga portugalishtja.

Redaksia Online
(a.h/shqiptarja.com)