Pa kaluar orë nga mbërritja në Kuvendin e Shqipërisë nga KED të emrit të Altin Binajt  për të plotësuar vakancën e fundit në Gjykatën Kushtetuese, Komisioni i Ligjeve ka kaluar sot në mëngjes për në seancë plenare.

"Komisioni i ligjeve voton z. Altin Binaj si kandidat për anëtar i Gjykatës Kushtetuese. Kuvendi i Shqipërisë përmbushi detyrimin kushtetues duke plotësuar 3 vendet e lira në këtë Gjykatë. Uroj që seanca plenare të votojë raportin e komisionit të ligjeve",- shkruan në një postim nënkryetarja e Kuvendit, Vasilika Hysi.

Ditën e djeshme, Këshilli i Emërimeve në Drejtësi ka dërguar për votim në Kuvend emrin e Altin Binajt për vendin vakant të Gjykatës Kushtetuese. Pas kalimit në komisionin e ligjeve sot, emri i Binajt do të votohet në Kuvend ditën e enjte që do të jetë dhe seanca e fundit parlamentare për këtë vit.

Mbrëmë, menjëherë pas vendimit të KED, reagoi edhe ambasadorja Yuri Kim ku përmes një postimi në Twitter ajo deklaroi se tashmë sapo Presidenca të emërojë gjyqtarin e saj, Gjykata Kushtetuese do jetë funksionale.

Edhe ambasadori i BE-së, Luigi Soreca ka përshëndetur progresin e bërë për ndërtimin e Gjykatës Kushtetuese. Ai tha se tashmë është e rëndësishme që të vazhdohet në të njëjtën frymë për të përfunduar listat e anëtarëve të tjerë që do emërohen nga Presidenti.

Në ditët në vijim, KED pritet t’i dërgojë kandidaturat Presidencës, të renditura sipas pikëve, për vendin vakant, të krijuar pas shkarkimit të Besnik Muçit. Në garë për vendin e Muçit janë Sonila Bejtja, Aleksandër Toma si dhe Zhaklina Peto.

Aktualisht Gjykata Kushtetuese ka katër anëtarë; Vitore Tusha, Elsa Toska, Marsida Xhaferllari dhe Fiona Papajorgji, nga 9 në total. Që Gjykata Kushtetuese të shqyrtojë çështje në seancë plenare dhe të marrë vendime, duhet të ketë 6 anëtarë. Duke e konsideruar Binajn të miratuar, duhet edhe një anëtar të Kushtetuesja të funksionojë.