‘Pamje që s’i ka parë syri i njeriut’, Artemis II përfundon fluturimin pranë Hënës në largësi rekord nga Toka! Nis rrugëtimi i kthimit për 4 astronautët (VIDEO)

Ja një vështrim mbi atë që astronautët e misionit Artemis II fotografuan gjatë fluturimit të tyre rreth Hënës.

Reid Wiseman, Victor Glover dhe Christina Koch, së bashku me astronautin e CSA-së (Agjencia Hapësinore Kanadeze) Jeremy Hansen, vendosën rekordin për distancën më të madhe nga Toka të arritur ndonjëherë nga një njeri, duke tejkaluar distancën e Apollo 13 prej 406,771 kilometrash.

Foto e shkrepur nga astronautët në bordin e Artemis III, nga ana më e panjohur e Hënës

Shtëpia e Bardhë ka publikuar imazhe të rralla dhe historike të Tokës, të kapur nga ana më e largët e Hënës

Fotografitë janë realizuar më 6 prill 2026 nga mjeti hapësinor Orion, në momentin kurToka shfaqet duke u zhytur përtej horizontit hënor, një perspektivë kjo, e pazakontë që e paraqet planetin tonë “nga ana tjetër”.

“Njerëzimi, nga ana tjetër. Fotografia e parë nga ana e largët e Hënës”, thuhet në postimin zyrtar të Shtëpisë së Bardhë, që shoqëron imazhin.

Mes fotove tw publikuara wshtw edhe ajo e eklipsit dhe momentit kur hwna mbulon diellin. 

Publikimi i fotove  vjen teksa misioni Artemis II përfundoi një fluturim historik shtatëorësh pranë Hënës, duke thyer rekordin e mëparshëm të Apollo 13 në vitin 1970 dhe duke kapur imazhe të anës më misterioze të hënës. 

Foto e shkrepur nga orbita hënore. Hëna mbulon diellin duke ofruar një pamje që njerëzimi nuk e ka parë kurrë më parë.

Astronautët e Artemis II të NASA kanë publikuar pamje mahnitëse fare pranë Hënës ku shihen qartë krateret në sipërfaqe. Shumëllojshmëria e ngjyrave nxjerr në pah tiparet gjeologjike të Hënës. Ky është udhëtimi i parë kaq larg tokës që NASA ka realizuar.

Gjatë misionit Artemis II, astronauti Jeremy Hansen i tha Kelsey Young të NASA-s se ekuipazhi do të dëshironte të emëronte disa kratere në Hënë që ata mund të shihnin “si me sy të lirë, ashtu edhe me lente të gjata”.

Një nga këto kratere është një pikë e ndritshme pranë sipërfaqes së Hënës. Ekipi propozoi ta emërtonte “Carroll”, një homazh për gruan e ndjerë të komandantit të Artemis II, Reid Wiseman, Carroll Taylor Wiseman, e cila vdiq nga kanceri në vitin 2020 në moshën 46-vjeçare.

Trump përgëzoi astronautët e Artemis II për fluturimin e tyre pranë Hënës gjatë një lidhjeje surprizë me ta.

 “Njerëzit në të vërtetë nuk kanë parë kurrë diçka si ajo që po bëni ju. Është vërtet e veçantë”, tha ai teksa më pas i pyeti edhe për shkëputjen e plotë me Tokën që zgjati rreth 40 minuta. Gjatë kësaj kohe, astronautët nuk kishin më sinjal.

Astronauti Victor Glover u përgjigj duke thënë se bëri “një lutje të vogël”, por më pas iu desh të vazhdonte punën për të regjistruar vëzhgimet shkencore të anës së largët të Hënës.

“Ishim të zënë këtu lart dhe po punonim shumë fort, dhe duhet të them se në fakt ishte mjaft mirë,” shton Glover.

“Cila është pjesa më e paharrueshme e kësaj dite vërtet historike?”, pyeti Trump.

Komandanti Reid Wiseman ishte i pari që u përgjigj dhe filloi duke thënë se telefonata nga presidenti ishte “sigurisht shumë e veçantë për të gjithë ne”.

“Pamë pamje që asnjë njeri nuk i ka parë ndonjëherë, madje as gjatë Apollo-s, dhe kjo ishte e jashtëzakonshme për ne,” tha Wiseman.

Ai vazhdoi duke shpjeguar vëzhgimet e ekuipazhit për eklipsin diellor dhe tha se të katër anëtarët kishin komentuar se sa “të entuziazmuar jemi të shohim këtë komb dhe këtë planet të bëhen një specie me dy planetë”, duke iu referuar synimeve për misione të ardhshme drejt Marsit.

Eklipsi diellor

Astronautët e Artemis II patën mundësinë të shihnin edhe një eklips diellor. Victor Glover e përshkroi pamjen si “të pabesueshme” duke dhënë detaje edhe për koronën e Diellit.

“Kjo vazhdon të jetë e pabesueshme. Dielli ka kaluar pas Hënës dhe korona është ende e dukshme, është e ndritshme, duke krijuar një lloj aureole pothuajse rreth të gjithë Hënës. Por kur arrin nga ana e Tokës, është ndriçimi i Tokës që tashmë është i dukshëm.

Dua të them, pothuajse disa sekonda pasi Dielli u zhduk pas Hënës, mund të shihje ndriçimin e Tokës. Toka është aq e ndritshme atje dhe Hëna thjesht qëndron përpara nesh. Kjo sferë e errët përpara nesh tani, jo errësira e plotë, por gri që përzihet dhe zbehet në errësirë. Ne mund të shohim yje dhe planetë pas saj.

Christina është në dritaren një, Reid është në dritaren dy me lentën e gjatë dhe Jeremy po e përshkruan nga dritarja tre. Është një pamje vërtet mbresëlënëse.

Mund të shohësh ende horizontin me një ndriçim më të fortë… aty ku Dielli perëndoi në atë anë të Hënës. Dhe ndriçimi i Tokës është shumë i dallueshëm dhe krijon një iluzion vizual mjaft mbresëlënës.

Uau, është e mrekullueshme.”