TIRANE-Report TV publikon pamjet e ngjarjes së rëndë pasditen e djeshme në qytetin e Beratit kur një punonjës i bashkisë humbi jetën aksidentalisht, pasi ra nga pema që po priste. Ka qenë ora 16:40 në vendin e quajtur “Ura e Goricës”, kur 46-vjeçari Shkëlqim Metkaj banues në fshatin Kamçisht është ngjitur me shkallë për të prerë një pemë. Në momentin që pema ka rënë ka goditur shkallën, e cila ka përplasur punonjësin, që nuk ishte i lidhur me litar. 

Rënia nga lartësia ka qenë fatale, pasi si pasojë e dëmtimeve të shumta ndërroi jetë në vend. Zona është e populluar dhe në atë moment të pranishëm në vendin e ngjarjes kanë qenë mjaft qytetarë që kanë vrapuar për t'i dhënë ndihmën e parë, por punëtori nuk arriti që të mbijetonte. Për ngjarjen është arrestuar inxhinieri i pyjeve Karafil Bregu 31 vjeç banues në lagjen 'Uznovë' Berat.

Ai akuzohet se nuk kishte marrë masat e mbrojtjes në punë për si dhe nuk ka qenë prezent gjatë punës ku u rrëzua punonjësi i drejtorisë së Bujqësisë pranë Bashkisë Berat, i cili ndërrojë jetë. Materialet u referuan  në Prokurorinë pranë Gjykatës së Shkallës së Parë Berat, për veprën penale “Shkelja e rregullave të mbrojtjes në punë”, parashikuar nga neni 289 i Kodit Penal.