Panairi i Librit 2017, të
rinjtë kërkojnë risi dhe cilësi

Është çelur këtë të mërkurë në Pallatin e Kongreseve edicioni i 20-të i Panairit të Librit “Tirana 2017”. Panairi i hapur prej orës 9.00 të paradites , bashkon autorë, botues, lexues, përkthyes dhe përfaqësues të medias. Panairi edhe pse vjen më i zvogëluar ka ofruar më shumë lexues të rinj.

“Pavarësisht se jemi në shkollë, u munduam që të vinim të shihnim librat e rinj. Jam e lumtur të shoh që rinia është ende e dashuruar pas librave dhe jo pas rrjeteve sociale. Shpresoj që të vazhdojë kështu sepse libri është pasuria më  madhe e njeriut. Në fakt prisja që panairi i sivjetshëm të ishte një bum i vërtetë. Çmimet janë normale nuk janë të shtrenjta.”, thonë të rinjtë.

Ndërkohë botuesit kanë bërë një formë proteste paqësore në muret e Pallatit të Kongreseve, ku kanë ngritur shqetësimin e tyre që lidhet me mungesën e mbështetjes nga politikat shtetërore, taksat, tatimin e vlerës së shtuar apo cilësinë e letrës.

Në këtë vit sipas kryetarit të shoqatës së Botuesve Petrit Ymeri gjendja ekonomiko-financiare nuk lejon prezantimin  në nivelin më të lartë të librit, autorëve, titujve të rinj apo ribotimeve. Në ditën e  parë të panairit kanë nisur edhe promovimet e librave më të rinj nga shtëpitë botuese.

 

Redaksia Online
J.Sh Shqiptarja.com