Pandemia Covid/ Anulohet ceremonia e ndarjes së çmimeve Nobel

Fondacioni Nobel, i cili administron ndarjen e çmimeve prestigjioze Nobel, thotë se për shkak të pandemisë koronavirusit, ka anuluar ceremoninë tradicionale, që mbahet çdo vit në muajin dhjetor, në Sallën e qytetit të Stokholmit.

Lars Heikensten, drejtori i përgjithshëm i Fondacionit Nobel, tha se për shkak të masave të kufizimeve, nuk është e mundur të mblidhen deri në 1.300 mysafirë.

Ai tha se për shkak të pandemisë është e pasigurt nëse fituesit e çmimeve do të mund të udhëtojnë në Suedi.

Fituesit shpallen në tetor, por fondacioni tha se nuk ishte plotësisht e qartë ende se si dhe në çfarë forme do të zhvillohet ceremonia e ndarjes së çmimeve.

"Ky është një vit shumë i veçantë kur të gjithë duhet të bëjnë sakrifica dhe t'u përshtaten rrethanave plotësisht të reja, por ne do t'u kushtojmë vëmendje të ndryshme fituesve të çmimeve, zbulimeve dhe veprave të tyre", tha Heikensten në një deklaratë.

Në vitin 2019 Nobeli për Letërsi shkoi për shkrimtarin austriak Peter Handke, i akuzuar si ithtar i Sllobodan Millosheviçit, gjë që provokoi reagime të shumta jo vetëm në Kosovë dhe Shqipëri por edhe në arenën ndërkombëtare

TAG:
• Suedi
• pandemi
• covid
• Anulohet ceremonia e Nobel