Dy drejtues automjetesh janë ndëshkuar me gjoba nga Policia Rrugore e Lezhës, pasi u kapën në flagrancë duke kryer parakalime të rrezikshme në urën e Matit.

Pas publikimit të një videoje në faqen “Harta Digjitale e Aksidenteve Rrugore”, ku shfaqeshin dy automjete që tejkalonin rrezikshëm në një nga pikat më të ngarkuara dhe të rrezikshme të qarkullimit rrugor në veri të vendit, shërbimet e Policisë ndërhynë menjëherë.

Nga veprimet e shpejta hetimore dhe verifikimet përkatëse, u bë i mundur identifikimi i drejtuesve dhe pronarëve të automjeteve me iniciale N. Gj., banues në Milot, Kurbin dhe M. P., banues në Mamurras, Kurbin

Të dy u ndëshkuan me një gjobë prej 10 000 lekësh secili, për shkelje të rregullave të qarkullimit.

Njoftimi i policisë:

Shërbimet e Policisë Rrugore të Lezhës, pas publikimit të një videoje në faqen “Harta Digjitale e Aksidenteve Rrugore”, në të cilën shfaqeshin dy automjete që kryenin parakalim të rrezikshëm në urën e Matit, kanë kryer menjëherë veprimet për identifikimin e drejtuesve të automjeteve.

Nga verifikimet, u identifikuan drejtuesit dhe pronarët e automjeteve, shtetasit N. Gj., banues në Milot, Kurbin, dhe M. P., banues në Mamurras, Kurbin. Në zbatim të nenit 146 të Kodit Rrugor, ata u ndëshkuan secili me masën administrative 10 000 lekë, për shkeljen e kryer.

Policia Rrugore e Lezhës falënderon qytetarët dhe median, për kontributin në evidentimin e shkeljeve të rregullave të qarkullimit rrugor, dhe i fton që të vijojnë të denoncojnë, pasi reagimi do të jetë i menjëhershëm, i paanshëm dhe konform ligjit.