Parku Botanik, Koka inauguron 
projektin për 10 mijë fidanë të rinj 

TIRANE - Tiranës nga sot i është shtuar edhe një tjetër hapësirë e gjelbërt. Në kuadër të Ditës Kombëtare të Shërbimit Pyjor, Ministri i Mjedisit Lefter Koka inauguroi sot fillimin e punimeve për ngritjen e Parkut Botanik, i cili do të shtrihet në të gjithë hapësirën e Universitetit Bujqësor në Tiranë.

Parku Botanik do të zërë një sipërfaqe prej rreth 83 mijë metër katror, në pjesën jug-perëndimore të godinës së rektoratit të UBT-së.
 
Në këtë park do të mbillen 10 mijë fidanë, 50 lloje speciesh drusore në blloqe me nga 200 fidanë për secilin lloj.
 
Vizita e ministrit të mjedisit në kampusin e Universitetit Bujqësor u parapri nga një takim me akademikë e specialsitë të pyjeve, ku Koka tha se deri në fund të mandaitit të qeverisës synohet të mbillen rreth 10 milionë fidanë.

“U angazhuam dhe gjatë vitit të kaluar mbollëm 2.5 milionë fidanë ndërsa synojmë që në fund të mandatit të mbjellim 10 milionë fidanë” - tha Ministri Koka.
Më tej Koka shpërndau çertifikata mirënjohje për inxhinierë të pyjeve dhe punonjësit e shërbimit pyjor që kanë shërbyer me përkushtim ndër vite.

Duke folur për një nga problematikat aktuale siç është proçesionarja, ose sëmundja e pishave, Ministri Koka tha: “Proçesionarja është një problematikë edhe për vende të tjera, por jam i kënaqur t’ju njoftoj se për herë të  parë do të zgjidhim tërësisht problemin e procesionares duke marrë masa për ta luftuar në mënyrën më të mirë”.


Redaksia online
(F.M/Shqiptarja.com)