Partia e Fortë: Na duhet opozitë e
mirë..dhe 1 biletë Thaçit për pushime

Subjekti politik “Partia e Fortë” ka nisur të ironizojë figurën e liderit të PDK-së, Hashim Thaçi, i cili me shumë gjasa do të kalojë në opozitë.
 
Kështu, kryesia e kësaj partie ka vendosur t’i bëjë një dhuratë liderit të Partisë Demokratike të Kosovës, Hashim Thaçi, menjëherë pas zgjedhjeve.
 
Sipas tyre, vendi ka nevojë për një opozitë të fortë, kështu që Thaçit i duhen disa ditë relaks për të kryer siç duhet punën e tij në opozitë tashmë. Lajmi është dhënë, nëpërmjet rrjeteve sociale, nga nënkryetari i Partisë së Fortë, Petrit Reçica.
 
Ky i fundit ka postuar një biletë për 2 javë pushim në Antalia në emër të kryeministrit Thaçi. Më tej, ai i bën thirrje Thaçit të vijë të tërheqë biletën pasi nuk di ku ta adresojë, pasi lideri i PDK-së nuk gjendet as në zyrën e kryeministrisë dhe as në shtëpinë e tij në rikonstruktim e sipër.
 
Ky nuk është rasti i parë që komentohen pozitat e Thaçit në qeveri. Pak ditë më parë, ai krahasohej ish-kryeministrin e Luksenburgut, Zhan Klod Juncker, i cili edhe pse doli fitues në zgjedhje nuk arriti të kryesonte qeverinë. 

Subjekti politik “Partia e Fortë” nuk është pjesë e asnjërit koalicion në këto zgjedhje. Sipas udhëheqësve të tij, partia pret ditën kur do të udhëheqë e vetme me Kosovën dhe buxhetin e saj




Redaksia Online
(Gre.M/Shqiptarja.com)