Partia e Lirisë ka reaguar me një deklaratë publike, duke kritikuar politikat e qeverisë në fushën e arsimit dhe menaxhimin e kostos së jetesës në vend. Sipas Sekretares për Marrëdhëniet me Publikun, Arla Merja, pas 12 vitesh qeverisje, situata e arsimit është përkeqësuar, ndërsa qiratë në Tiranë janë bërë të papërballueshme dhe studentët përballen me vështirësi për të mbuluar shpenzimet minimale. Partia e Ilir Metës shprehet se zgjidhja e propozuar nga qeveria, për zhvendosjen e studentëve jashtë kryeqytetit, nuk adreson problemin, por e shmang atë.

Në deklaratë, Merja thekson se studentët nuk kanë nevojë për kampe universitare të reja apo projekte që ekzistojnë vetëm në letër, por për arsim cilësor, të përballueshëm dhe të lidhur me tregun e punës. Ajo shton se financimi i arsimit mbetet ndër më të ulëtit në Europë, se premtimi për 5% të PBB-së nuk është mbajtur dhe se pagat e pedagogëve janë të ulëta, duke nxitur largimin e stafit akademik dhe emigrimin e të rinjve.

Deklarata e plotë e Sekretares për Marrëdhëniet me Publikun në Partinë e Lirisë, Arla Merja

"Të nderuar qytetarë!

Sot, pas 12 vitesh pushtet absolut, Kryeministri Edi Rama pranon indirekt dështimin e tij në arsim dhe në menaxhimin e jetesës në Shqipëri. Kur qiratë në Tiranë janë bërë të papërballueshme, kur studentët nuk përballojnë më as jetesën minimale dhe kur rinia po largohet masivisht nga vendi, zgjidhja që ofron qeveria është t’i largojë studentët nga kryeqyteti dhe jo të rregullojë problemin.Kjo nuk është politikë publike. Ky është dorëzim. Dorëzim ndaj gjendjes në të cilën me duart e tyre, e cuan Shqipërinë. Sot, qytetarët kanë kostot e jetesës më të larta në rajon dhe pagat më të ulëta. Studentët nuk kanë nevojë për një kampus të ri në Durrës dhe as për një “Durana nr. 2”, që ekziston vetëm në letër dhe në propagandë. Ata nuk kanë nevojë të udhëtojnë çdo ditë dhjetëra kilometra për të ndjekur auditoret, duke humbur kohë, para dhe energji. Ata kanë nevojë për arsim cilësor, të përballueshëm dhe për perspektivë në vendin e tyre.Faktet flasin qarte:
-Shqipëria renditet ndër vendet e fundit në Europë për financimin e arsimit.
-Premtimi për 5% të PBB për arsimin nuk u mbajt kurrë.
-Pagat e pedagogëve mbeten ndër më të ulëtat në rajon, duke nxitur largimin e trurit akademik.
-Shkenca dhe inovacioni janë praktikisht të pafinancuara.
-Arsimi nuk lidhet me tregun e punës, çka i lë të rinjtë ose të papunë, ose të detyruar të emigrojnë.

E ashtuquajtura “reformë në arsim”, e bërë nga vetë Kryeministri, ka dështuar plotësisht. Sot kemi më pak studentë, më pak besim në universitetet publike dhe më shumë të rinj që zgjedhin të largohen nga Shqipëria.Problemi kryesor nuk është mungesa e godinave. Problemi është shpopullimi i vendit nga rinia, një hemorragji kombëtare që kjo qeveri jo vetëm nuk e ndali, por e përshpejtoi.Edi Rama kishte 12 vite kohë të mbante premtimet. Nuk e bëri. Sot nuk ka më zgjidhje për të ofruar, vetëm justifikime dhe projekte propagandistike. Prandaj, sot nuk është koha për eksperimente urbane dhe slogane boshe.  Sot është koha që kjo qeveri të largohet, sepse ka dështuar në çdo aspekt të qeverisjes, përveç njërit: demagogjisë dhe mashtrimit publik."