Pak minuta pas krimit në Vlorë, ku mbeti i vrarë me armë zjarri pistoletë 40-vjeçari, Fation Sinani, ka ndodhur shpërthimi i një automjeti fare pranë banesës së tij.

Ngjarja ka ndodhur në një kohë kur zona ishte e rrethuar me forca të shumta policie.

Automjeti i shpërthyer është tip "Ford Focus" AA987 KP, në pronësi të E.I., 42 vjeç. Nga kjo ngjarje nuk ka të lënduar, përveç dëmeve materiale. 

Mësohet se makinës i ishte vënë lëndë eksplozivi në pjesën e përparme, duke i shkaktuar dëmtime të shumta. 

Ende nuk dihet nëse shpërthimi ka lidhje me krimin që i mori jetën Sinanit në banesën e tij. 

[gallery]22749[/gallery]
Policia jep detaje nga shpërthimi i automjetit: 
Rreth orës 22:58, në lagjen "15 Tetori", autorë të paidentifikuar ende i kanë vënë lëndë plasëse (shpërthyese) automjetit tip Ford Autoveturë me targë AA 987 KP.

Automjeti ka qenë i parkuar në një rrugë dytësore pranë Bashkisë së qytetit, në pronësi të shtetasit E.I., 42 vjeç.

Si pasojë e shpërthimit mjeti është dëmtuar në pjesën e përparme.

Grupi hetimor ndodhet në vendngjarje duke kryer hetimet e mëtejshme në lidhje me sqarimin e rrethanave të këtij rasti.

Po punohet për identifikimin dhe kapjen e autorit.

Redaksia Online
l.q/Shqiptarja.com