‘Pasi e qerasa me bakllava më nxori djalin në pritë’, dëshmia e plotë e nënës së Endri Mustafës, lidhjet me Astmer Bilalin dhe Licin, konflikt edhe me djemtë e Paulin Radovanit

Report Tv sjell dëshminë e plotë në gjykatë të Fahrije Mustafës, nëna e 32-vjeçarit Endri Mustafës, i cili u gjet i vrarë me 6 plumba në muajin maj të vitit 2021, në zonën e Livadheve në Shkodër. Për këtë vrasje është arrestuar 15-vjeçari Ergys Malja, për të cilin prokuroria kërkon 12 vite burg si bashkëpunëtor në krim, pasi dyshohet se ka nxjerrë Endri Mustafën në pritën e vrasësve. I mituri ka rrëfyer se Endri Mustafën e vrau Ibrahim Lici, i shpallur në kërkim prej një viti.

Por, nëna e Endri Mustafës, Fahrije Mustafa, ka rrëfyer se djalin e saj në pritë e ka nxjerrë 15-vjeçari Ergys Malja. Në gjendje të rënduar emocionale dhe duke qartë vazhdimisht, Fahrije Mustafa ka rrëfyer se djalin e saj e ka pritur dhe vrarë Edison Arazi. Sipas Fahrije Mustafës, Ergys Malja dhe Edsion Arazi hynin e dilnin tek Astmer Bilali, por edhe tek shtëpia e saj. Fahrije Mustafa thotë se djali i saj kishte shoqëri edhe me Astmer Bilalin, por edhe me Ibrahim Licin, por që nuk kishte punë me asnjërin prej tyre.

Fahrije Mustafa thotë se djali i ruhej prej një viti pasi kishte pasur një konflikt me djemtë ish-prefektit të Qarkut Shkodër, Paulin Radovani, të cilët merrnin para me fajde. Fahrije Mustafa pohon se një ditë pasi i kishte nxjerrë të birin në pritë, 15-vjeçarin Ergys Maljan e kishte qerasur me bakllava në Shtëpinë e saj.

Zonja Mustafa këmbëngul se e kishte paralajmëruar disa herë djalin e saj që të kishte kujdes nga 15-vjeçari pasi mund të nxirrte në pritë. Pavarësisht pyetjeve të prokurorit, avokatëve dhe gjyqtarit, Fahrije Mustafa nuk ka dha një përgjigje të qartë se pse duhet të kishte të frikë se djalin e sja mund ta vrisnin kur nuk kishte konflikte dhe pse Ergys Malja duhet ta nxirrte në pritë.

Dëshmia e plotë e Fahrije Mustafa, nënës së viktimës Endri Mustafa

-Fahrije Mustafa (Aliaj): Betohem se do të them të vërtetën (qan vazhdimisht).

-Prokurori: Me datë 15 maj 2021, a mund të na shpjegoni me detaje të gjithë lëvizjet në raport me djalin tënd?

-Fahrije Mustafa (Aliaj): Dua ta filloi që me datën 14 kur më ka ardhur ni ky monstra në shpi (Ergys Malja) se nuk e shoh dot (qan). Nga mesdita, Ergys Malja na ka ardh në shpi dhe i hapa derën. U fut mrena se ka kenë ditë Bajrami. Unë si nanë e qerasa këtë djalin, i qita bakllavë, se më dhembin sytë me pa (qan). E lash me Endrin duke ba muhabet. I ka thanë Endrit a do me të sjellë një qengj me shit 14 mijë lekë. Endri i ka thanë mirë bjere ta shoh. Ergys Malja i ka thanë që kur të të dërgoj unë mesazh, ti dil në oborr të shohësh qengjin. Dhe ka ikur nga shpia (Ergys Malja).

Me datë 15, nga ora 6-7 (pasdite) unë dhe nusja nuk kemi kenë në shpi. Si përfundim, Ergys Malja ka ardhur dhe i ka sjellë qengjin. Pasi iku Ergysi, djali i tha nuses se më ka mbetur mendja tek një mungadet që më ka ba Ergysi për në Livadhe.

-Prokurori: Djali a të tha se çfarë muhabeti ishte?

-Fahrije Mustafa (Aliaj): Me ta thanë të vërtetën, jo. Nuk na e tha. Vetëm se tha se i ka mbetur mendja tek ai muhabet. Nusja i tha djalit mos u merr me të se është hajdut. I thashë edhe unë djalit me gojë teme, mos u merr më te, është i poshtër, a të kujtohet para një viti se çfarë ka thënë “unë për 3 mijë euro i nxjerrë njerëzit në pritë”.

-Prokurori: Këtë djalin e njihje më parë ti?

-Fahrije Mustafa (Aliaj): Po e njoh. 7-8 muaj para na ka ardh në shpi, ka kenë tetor, dhe ka lyp kalin për Astmer Bilalin, se nji ky Ergys është shoku që hyn del natë-ditë ke Astmer Bilali. Djali jem nuk është marrë as me Ibrahim Licin as me Astmerin. Shokë i ka pas, por ka thënë gjithmonë, se unë nuk merrem me ta… Unë i thash djalit, ky është fëmijë i keq, se po të nxjerrë në pritë për 3 mijë euro, atë të ka thënë vetë se për 3 mijë euro unë xjerri njerëz në pritë. I kishte thanë djalit, edhe dy vjet jam moshë e re, mund të baj çfarë du, manej nuk baj ma se me kap ligji.

Me datë 15, ka dalë djali jashtë, ka ndejt nja 10-15 minuta dhe i ka thanë nuses mi baj teshat gati se du me ik me Ergysin deri në Livadhe dhe për 10 minuta vij. Unë i thashë,…mos moj nanë mos shko me të se të nxjerrë në pritë, se kush e di se ça të ka ba me nanën. Jo mam, tha, mos ki merak, se unë për 10 minuta vij në shpi dhe ai nuk më erdhi më, s’më hapte celularin, ma ka qit djalin për paret, ma ka shuar shtëpinë, ah ça më ka bërë ky djalë. Më ka qit fare. Ma shujtë shpia (qan vazhdimisht).

Ky është mostër i tan botës, njeri i poshtër që më ka marrë në qaf… Djali më tha nan mos u bëj merak se nuk jam vetëm se jam edhe me “Colin”. Unë tash e kam marrë vesh se “Coli” është Edison Arazi. Ata kanë hi dhe kanë dalë një vit rresht në shtëpinë tonë. Janë dy vllazën.

Ergys Arazi dhe Edison Arazi, janë shokët e Astmer Bilalit dhe kanë ndejt ditë-natë tek Astmer Bilali dhe aty është bërë gjurulldia. Kjo është meseleja që thoni se jo është Ibrahim Lici, jo ai. Askërkush nuk është dhe unë kam dhënë e deklaratën qysh në fillim, me datë 16-17 kur më kanë ardhur gazetarët. Edison Arazi ma ka vra djalin. Ergys Malja ma ka nxjerrë në pritë.

-Prokurori: Në dijeni tuaj, kur ka dalë djali, a ka patur armë me vete?

-Fahrije Mustafa (Aliaj): Me dijeninë teme jo. Ka dal pa kurrgja.

-Avokati i të akuzuarit: Me sa mban mend, në çfarë orë është dërguar mesazhi me ‘kokën e kalit’ në telefonin e djalit tënd.

-Fahrije Mustafa (Aliaj): Që ditën e parë kur ka ardhur në shpi, që i kamë qit bakllavë, i ka thanë do të çoj në mesazh me ‘kokën e kalit’. Di që në 15 maj 2021, i ka çu me mesazh ‘kokën e kalit’.

-Avokati i të akuzuarit: Çfarë problemesh kishte djali juaj që kishit frikë se po e nxjerrë në pirtë. Nga kush e kishte problemi?

-Fahrije Mustafa (Aliaj): Na nuk kemi pas kurrfarë frike për djalin. Na me Ibrahim Licin nuk kena punë. Na me Atmer Bilalin nuk kena punë. Kanë kenë shokë, por nuk kena punë. Unë nuk ka pas dijeni për konflikt.

-Avokati: Djali juaj ishte 33 vjeç. Ergysi ishte 14.5 vjeç. Sipas mendimit tuaj, çfarë i lidhte këta të dy? Djali juaj ishte edhe në kërkim. Çfarë i lidhte këta të dy? Si ia ka mbushur mendjen?

-Fahrije Mustafa (Aliaj): Ne zotni na ndan një mur me shpi. E kam komshi Ergysin. Ky mes pas një armë itash, të tanë i sharron. A don tjetër ti? Si ia ka mbush mendjen? Ia ka mbush pra. Se si ia ka mbush, këtë nuk e di. Ky me pas armë, më vret edhe mua itash. Babai i tij, ai i Admiri, atë ditë, ashtu u çua dhe i ka çuar një tas qershia vëllait tem, për të parë se si asht gjendja. Unë kam dalë nadje në Livadhe duke kërkuar djalin

-Avokati: Ju thatë se djali juaj kishte një vit që ruhej dhe nuk dilte. Pse nuk dilte? Me kë kishte konflikt?

-Fahrije Mustafa (Aliaj): Po kishte me Paulin Radovanin dhe djemtë e tij, që merrnin para me fajde. 

-Avokati: Meqë thoni se nuk ka pasur konflikte me njeri, kush mendoni se e ka vrarë djalin tuaj?

-Fahrije Mustafa (Aliaj): Ma ka marrë Ergys Malja praj dere. Edhe Edison Arazi e ka pritur te bypass.

SI.E./Shqiptarja.com

TAG:
• ergys malja
• astmer bilali
• Shkoder
• ibrahim lici
• vrasja e endri mustafes
• endri mustafa