PD: Rama 'bllok" dekriminalizimit
po inkriminon edhe pushtetin lokal

TIRANË - Demokratët akuzojnë kryeministrin Edi Rama se po pengon procesin e dekriminalizmit dhe se shefi i qeverisë nuk ka vullnet për këtë proces. Nga salia blu deputeti Gerti Bogdani tha se edhe pas 6 muajsh në arrest të deputetit Mark Frroku, kryeministri vijon t’i ruajë karrigen në parlament ndërsa Arben Ndoka ndonëse dha dorëheqjen rezulton të jetë sërish deputet pasi nuk është zëvendësuar.
 
Por për demokratët mungesa e vullnetit për dekriminalizimit po reflektohet edhe ne dy bashkitë më të mëdha në vend në Tiranë dhe Durrës, ku sipas deputetit Bogdani, kryebashkiakët po inkriminojnë pushtetin lokal.

Puna e komisionit të Dekriminalizimit ka mbetur tek negociatat mes palëve politike, ku maxhoranca dhe opozita kanë depozituara draftet përkatëse e po synohet miratimi i një ligji të përbashkët.

Deklaratë e deputetit Gerti Bogdani
Edi Rama është i vendosur të bllokojë dekriminalizimin me cdo mjet e mundësi që ka në dorë. Rastet që ai ka për të treguar vullnet, vazhdojne te shërbejnë si shembuj vendosmërie dhe këmbëngulje për të për të bashkjetuar me krimin, sepse eshte ai që i ka hapur dyert krimit dhe i ka bërë sot pjesë të parlamentit dhe qeverisjes.

Prej 6 muajsh, deputeti Mark Frroku mungon në parlament për shkak se ka hesape për të mbyllur me drejtësinë belge. Por megjithatë, Edi Rama ia ruan me fanatizëm mandatin në Kuvend. Kaq mund të bëjë, po të kishte në dorë drejtësinë belge me siguri do bënte edhe më shumë. E fshehu kërkesën e interpolit dy herë për deputetin dhe aleatin e tij, në këmbim të zgjedhjeve në Pukë, në këmbim të manipulimkit të procesit ndaj Ilir Metës.

Po kështu, i zgjedhuri i tij Arben Ndoka, edhe pse deklaroi se e dorëzoi mandatin, sërish rezulton deputet. Asnjë shenjë nga Edi Rama për ta larguar nga radhët e tij, sepse për me tepër nuk ka as me ke ta zevendesoje, deputeti i radhes i Edi Ramës është gjithashtu i dënuar nga gjykata.
Dhe këto, pavaresisht denoncimeve edhe nga Departamenti i Shtetit.

Ndërkaq, dy prej të emëruarve të tij, ky në krye të Tiranës dhe ai i Durrësit po inkriminojnë me shpejtësi pushtetin lokal.
Veliaj ka caktuar drejtorë të rëndësishëm në Ujësjellës dhe tek Tatimet, autorë të plagosjeve të rënda. Asnjë reflektim, edhe pse ne i denoncuam publikisht dhe me prova. Asnje reflektim, edhe pse Tirana ka plot të rinj dhe intelektualë, Veliaj zgjedh njerëz të inkriminuar që t’i sherbejnë atij çdo ditë dhe jo qytetarëve.
Dako i Durrësit ka shkuar edhe më larg. Ai ka emëruar administrator të Sukthit, një njeri me precedent të tmerrshëm kriminalë dhe pikërisht personin që gjatë fushatës së zgjedhjeve goditi dhe plagosi aktivistë të PD-së.

Të gjitha këto po ndodhin me frymëzimin e Edi Ramës, i cili ka bllokuar dekriminalizimin dhe po mbjell inkriminime të reja kudo ku jepet rasti.
Partia Demokratike është e vendosur dhe do ta çojë deri në fund këtë proces. Do apo nuk do Edi Rama. Kriminelët nuk do të kenë të ardhme, nuk do të kenë poste e vendimmarrje. Nuk do të kenë dhe nuk duhet të kenë në dorë fatin e qytetarëve

Redaksia Online
(Gre.M/Shqiptarja.com)