PD: Referendumi që do Rama
mbi kufirin detar, jo kushtetues

TIRANE - Partia Demokratike doli përsëri sot në një konferencë për shtyp tema kryesore e të cilës vazhdon të jetë heqja e imunitetit. Si edhe më parë, zëdhënësja Silvi Bardhi përsëriti akuzat ndaj kryesocialistit Edi Rama duke deklaruar se “kryetari i Partisë Socialiste dhe miliarderët e Partisë Socialiste, e kanë jetike mburojën e imunitetit me të cilën bllokojnë hetimin e origjinës së pasurive të tyre”.

Sipas PD, nga deklarimi i pasurive të deputetëve, “rezulton se vetëm njëri nga anëtarët e kupolës së miliarderëve të Partisë Socialiste, deputeti Abazi, ka deklaruar një pasuri me mbi 50 milionë dollarë. Nga kjo pasuri prej mbi 50 milionë dollarë vetëm ndërtime me leje të kryetarit Rama por dhe pa leje fare, janë rreth 7 mijë metër katrorë, kurse të tjerat, të ardhura nga kompania USLUGA që përdor imunitetin e Presidentit të saj, zotit Sadri Abazi, për fitime përrallore”.

Zëdhënësja Bardhi deklaroi se deputeti në fjalë “ka edhe 11 veprimtari të tjera në ndërtim e sipër. Ato që janë deklaruar janë vetëm maja e ajsbergut të pasurisë së tij. Këto të dhëna faktojnë se për të mbrojtur pasuritë prej mbi 50 milionë dollarësh të zotit Abazi, kryetari i Partisë Socialiste dhe miliarderët e Partisë Socialiste, e kanë jetike mburojën e imunitetit me të cilën bllokojnë hetimin e origjinës së pasurive të tyre”.

Sipas demokratëve, mes rivalëve të tyre socialistë mbizotëron një kaos i plotë që shfaqet në qëndrime kontradiktore. PD deklaroi se referendumi mbi çështjen e kufirit detar nuk lejohet nga Kushtetuta. “Rama kërcënon qytetarët dhe mazhorancën se ai në kundërshtim flagrant me Kushtetutën e vendit, e cila nuk lejon kurrë referendume për çështje territoriale, do të kërkojë referendum për kufirin detar të vendit”.

Sipas PD, “me këtë deklaratë, Kryetari i Partisë Socialiste Edi Rama dhe klubi i miliarderëve në kryesinë e Partisë Socialiste, provojnë se për të kundërshtuar heqjen e imunitetit janë gati të dhunojnë Kushtetutën e vendit dhe të shkelmojnë vendimin e Gjykatës Kushtetuese”.

(im/shqiptarja.com)