Nga porti i peshkimit të Durrësit, gjatë një bashkëbisedime me peshkatarët, Ministri i Bujqësisë dhe Zhvillimit Rural, Niko Peleshi, garantoi se  ky port do të jetë në vazhdim vetëm në shërbim të anijeve të peshkimit dhe jo vendparkim për jahtet luksoze të pasanikëve shqiptarë.

“Së pari dua ta them që jemi në një port, në një investim të ri, që i cili vetëm sot në fakt ka filluar të përdoret nga anijet e para, nga dy anije të peshkimit, për shkak se ka qenë i okupuar nga mjete të tjera, jahte private e të tjera, që nuk kanë lidhje me qëllimin për të cilin ky port është ndërtuar.  Unë po e them sot dhe natyrisht do ta dëgjojnë dhe strukturat tona shtetërore, policia kufitare etj, që ky port nga sot e në vazhdim, duhet të mbahet i paprekur nga asnjë lloji mjeti tjetër, përveçse nga ato për të cilat është ndërtuar, pra nga anijet e peshkimit”, tha Peleshi.

Peleshi foli edhe për masat e reja që ka ndërmarrë qeveria në favor të kësaj industrie.

“Natyrisht një sektor mbështetet duke e bërë atë konkurrues. Ulja e kostove arrihet përmes uljes së kostove finaciare, por edhe kostove burokratike, apo administrative. Heqja e aksizës për naftën, për peshkimin, tregoi që menjëherë i dha një impuls këtij sektori. Sot brenda këtij viti në paketën e re fiskale, pra ne sot po punojmë që në paketën fiskale për vitin 2018, të futim përjashtimin nga tatimi i vlerës së shtuar për gjitha mjetet e bordeve të anijeve", shtoi ministri.

Në ndihmë të industrisë së peshkimit, Ministri Niko Peleshi shtoi se veç uljes së kostove finaciare, do të ulen edhe kostot administrative, burokratike apo logjistike.

d.c./shqiptarja.com