Akuzohen për pengim drejtësie, nis gjyqi ndaj Hashim Thaçit dhe të tjerëve! Prokurori: Udhëzimet e tij kishin në shënjestër dëshmitarë specifikë

Në Gjykatën Speciale në Hagë, këtë të premte nisi gjykimi për çështjen e dytë për të cilën akuzohet Hashim Thaci, ai për pengimin e drejtësisë. Së bashku me ish Presidentin e Kosovës, prokuroria speciale, akuzon edhe Bashkim Smakajn, Isni Kilajn, Fadil Fazliun dhe Hajredin Kuçin. Të pestë të akuzuarit u vetëdeklaruan të pafajshëm në nisje të seancës.

Prokurori Joshua Hafetz në nisje të fjalës së tij shfaqi fragmente të bisedave të incizuara në Hagë, gjatë takimeve të Thaçit me vizitorët e tij, përfshirë disa nga të akuzuarit, ku ai pretendoi se është tentuar të ndikohej te dëshmitarët.

“Zyra e Prokurorit të Specializuar (ZPS) do të tregojë se udhëzimet e Thaçit kishin një shënjestër: shënjestër ishin dëshmitarët specifikë, dëshmia e të cilëve, sipas Thaçit përbënte kërcënim”, tha ai duke shtuar se synimi ishte të shmangej ky kërcënim.

LEXO EDHE:
Sulmi amerikano-izraelit në Iran, Vjosa Osmani: Mbështesim veprimet e ndërmarra nga SHBA-të për t'i dhënë fund regjimit iranian

Sipas tij, motivi i Thaçit ishte se ai “nëse gjendet fajtor” në rastin për krime lufte, “do të dënohet me burgim të gjatë” dhe prandaj, sipas ZPS-së, ai përdori mënyra për të ndërhyrë në drejtësi.

“Provat do të tregojnë se sapo filloi çështja [për krime lufte] Thaçi u përqendrua në pengim të dëshmive të dëshmitarëve që mund ta dëmtonin mbrojtjen e tij. Thaçi kishte dy lloj dëshmitarësh. Të parët ishin personat e brendshëm të UÇK-së, që në mënyrë të veçantë i identifikoi Thaçi, që mendoi se ishin vendimtar në gjykimin ndaj tij, të cilët duhet të flisin për strukturën e UÇK-së dhe rolin drejtues të Thaçit. Lloji i dytë ishin dëshmitarët viktima që mund ta implikonin atë”, tha prokurori.

Ndërkohë kryeprokurorja Kimberly Westnisi akuzoi Thaçin dhe katër të akuzuarit të tjerë për përpjekje për të "minuar" Gjykatën Speciale.

"Ata në mënyrë të drejtpërdrejtë kanë shkelur vendimet gjyqyqësore që kanë pasur për synim që dëshmitarët dhe viktimat të japin dëshmi pa pasur frikë dhe që të kenë besimin se do t’u ruhej identiteti. Thaçi akuzohet se në mënyrë të vazhdueshme ka vazhduar që të ndërhyjë në dëshmitë e dëshmitarët dhe ka shkelur të gjitha rregullat e gjykatës që kanë pasur të bëjnë me mbrojtjen e informacionit konfidencial. Të bashkëakuzuarit kanë marrë pjesë në këto krime", tha West.

West i cilësoi të akuzuarit si pjesë e një grupi “të vogël në Kosovë që vendosin interesin e tyre mbi të tjerëve”, duke premtuar se do të ekspozojë veprimtarinë e tyre.

“Nëse të akuzuarit kanë pasur sukses në ndikimin e dëshmitarëve nuk ka rëndësi”, tha ajo.

Aktakuza pretendon se për disa muaj gjatë vitit 2023 ata kanë ndikuar në çështjen gjyqësore ndaj Thaçit, dhe tre ish-eprorëve të tjerë të Ushtrisë Çlirimtare të Kosovës për krime lufte dhe krime kundër njerëzimit.

Prokuroria pretendon se këto veprime kanë synuar të ndikojnë në rrjedhën e procesit gjyqësor. Pas përfundimit të deklaratave hyrëse, Prokuroria argumentoi se provat e saj ndaj pesë të akuzuarve janë “bindëse”.

“Ata kanë kryer vazhdueshëm krimet e përmendura në aktakuzë me vetëdije dhe kërkojmë që ata të dënohen në përputhje me ligjin”, tha ZPS.

Thaçi, ish-president i Kosovës, akuzohet edhe për krime lufte dhe krime kundër njerëzimit, së bashku me tre ish-eprorë të tjerë të Ushtrisë Çlirimtare të Kosovës: Kadri Veseli, Rexhep Selimi dhe Jakup Krasniqi.

Më 18 shkurt, gjatë dëshmisë në Dhomat e Specializuara të Kosovës në Hagë, Thaçi hodhi poshtë akuzat ndaj tij dhe duke theksuar se veprimtaria e tij gjatë luftës ka qenë në mbrojtje të popullit të Kosovës.

Nga pesë të akuzuarit në rastin kundër pengimit të drejtësisë, vetëm ndaj Hashim Thaçit ka masë paraburgimi. Ai gjendet në qendrën e paraburgimit në Hagë, ku po pret edhe vendimin e trupit gjykues për rastin kundër tij për krime lufte dhe krime kundër njerëzimit.

Rendit zhvillimet sipas orarit:

Të Fundit Të Parat