Këtë të mërkurë në orën 21:00 do të fillojë një nga sfidat më të shumëpritura të Champions League, ajo mes Bayern Munich dhe PSG-së, e vlefshme për aktin e kthimit në fazën gjysmëfinale. Tetë ditë më parë në 'Parkun e Princave' në Paris, vendasit e PSG-së fituan 5-4 në sfidën që për shumë ishte 'ndeshja e shekullit'.

Loja sulmuese, përmbysja, rastet e shumta dhe spektakli në fushë kanë bërë që pritshmëritë për ndeshjen e sotme të jenë shumë të larta. Sot vendoset për finalistin e dytë të Champions League dhe të dyja klubet nuk kanë ndërmend të hidhen në aventurë. Me Arsenalin që pret për finalen e 30 majit në Budapest, PSG është në avantazh kundër Bayern për vetë rezultatin e ndeshjes së parë.

Paçka humbjes, Bayern Munich luan përballë tifozëve të vet dhe në çerekfinale kaluan një ekip si Real Madridi, andaj një gol diferencë nuk duhet t'i vendos në gjendje qetësie të besuarit e Luis Enriques, me PSG-në që është kampione në fuqi e turneut.

Trajneri i Bayern Munich, Vincent Kompany do duhet të bëjë pa të lënduarit Gnabry, Kiala dhe Cardozo, ndërsa Luis Enrique nuk do të ketë po për shkaqe lëndimesh Hakimin, Chevalier dhe Ndjatou. Dueli gjykohet nga arbitri portugez, Joao Pinheiro.

Formacionet e mundshme:

Bayern Munich (4-2-3-1): Neuer; Stanisic, Upamecano, Tah, Laimer; Kimmich, Pavlovic; Diaz, Musiala, Olise; Kane

PSG (4-3-3): Safonov; Zaire-Emery, Marquinhos, Pacho, Mendes; Neves, Vitinha, Ruiz; Doue, Kvaratskhelia, Dembele

Rendit zhvillimet sipas orarit:
Ora 15:51
Bayern - PSG, Vincent Kompany: Prisni sërish spektakël, synojmë finalen

1778075574_vincentkompany.JPG

Gjysmëfinalja e kthimit mes Bayern Munich dhe Paris Saint Germain pritet të dhurojë sërish emocione të forta sot (21:00), me trajnerin e vendasve, Vincent Kompany, që kërkon mbështetje maksimale nga tifozët për të përmbysur rezultatin 4-5 dhe për të siguruar një vend në finalen e Champions League.

Tekniku belg kishte një mesazh të qartë për tifozët, se 'vetëm ata që janë gati të mbështesin skuadrën për 90 minuta pa ndalur duhet të jenë në stadium'.

Thirrja duket se është dëgjuar. Atmosfera në Mynih pritet të jetë elektrizuese, ndërsa mesfushori Leon Goretzka parashikon një stadium “në flakë” për përballjen vendimtare.

Kompany nuk përjashton një tjetër duel të hapur dhe të mbushur me gola.

“Nëse të dyja skuadrat i qëndrojnë besnike stilit të tyre, atëherë mund të presim sërish një ndeshje spektakolare. Ne luajmë në shtëpi, duam të fitojmë dhe do të bëjmë gjithçka për ta arritur këtë,” u shpreh ai.

S.Dh/Shqiptarja.com