I digjet banesa në Vlorë, zonja e shtëpisë në lot: Djali ishte në gjumë...tani s'kemi ku të flemë (VIDEO)

Banorët e lagjes 'Partizani' në Vlorë janë tmerruar mëngjesin e sotëm nga flaka që përfshiu banesën e Pëllumbesha Braçes. Zjarri u përhap me shpejtësi duke rrezikuar edhe banesat e tjera, por flakët u shuan nga zjarrfikësit. Report Tv solli pamjet e zjarrit që përpiu shtëpinë. "U çfarë flake, shikoni si dalka flaka!!!! Ra soleta dhe shtëpia komplet. Oiii, morën shtëpitë tona" dëgjohen disa nga banorët. Ndërsa një fqinje e zonjës që iu dogj shtëpia dëgjohet duke thënë 'Do futem të marr qumështin e fëmijëve të paktën të mos lë fëmijët pa qumësht', por banorët e tjerë nuk e kanë lënë që të futet në banesën e saj që ndodhej pranë asaj që u dogj.

Zjarri që ra dhe dogji shtëpinë e Pëllumbesha Braçes në Vlorë rrezikoi edhe banesat e tjera që ishin pranë. Një fqinje e zonjës që iu dogj shtëpia tregon momentet e tmerrit. "Këtu u bë kasaphanë, ulërima. Na nxorën me fëmijë me mbesa, bombola e gazit ishte brenda. Nuk na linte policia të hynim brenda, nxorën fëmijët. Për 5 minuta plasi flaka u dogjëm. Ju lutem shtetit, bashkisë vini dorën në zemër, jemi fukarenj, djali punon me bidona (mbledh kanaçe), burri i ka vdekur. Shikoni  fukarenjtë, jo të pasurit. Ndihma ka ardhur për fukarenjtë jo të pasurit" tha ajo.   

Zonja e shtëpisë, Pëllumbesha Braçe thotë se djali ishte në gjumë kur ra zjarri dhe i dogji shtëpinë e dajës, ku jetonte. Me lot në sy, gruaja kërkon ndihmë, pasi tani nuk ka ku fle, pasi ka mbetur në qiell të hapur. "Djali po flinte, mirë se e ndjeu. Ai ishte në gjumë. Nuk e pamë pse u dogj. Unë isha në oborr po ndizja zjarr, se nuk kam sobë. Dritat ishin ndezur. Të tëra me bufe janë djegur. Tani nuk kam ku të fle. Shtëpitë nuk i kam të miat, por të dajës. Isha pa shtëpi" tha ajo.