Përleshje në xhaminë 'Al-Aksa' mes policisë izraelite dhe besimtarëve palestinezë! Arrestohen 350 persona

Policia izraelite është përleshur me besimtarët palestinezë në xhaminë ‘Al-Aksa’ në Jeruzalimin lindor duke arrestuar 350 persona.

Palestinezët thanë se ndaj tyre u përdor gaz lotsjellës dhe plumba gome. Si pasojë 14 persona u plagosën.

Militantët në Rripin e Gazës më vonë hodhën nëntë raketa në drejtim të Izraelit dhe ushtria e tij kreu sulme ajrore si kundërpërgjigje. Dhuna e fundit vjen pak përpara një mbivendosjeje midis muajit të shenjtë të Ramazanit dhe festës së Pashkës hebreje.

Xhamia al-Aksa, vendi i tretë më i shenjtë në Islam, ndodhet në një kompleks në majë të kodrës, i njohur nga muslimanët si al-Haram al-Sharif (Shenjtori fisnik) dhe nga hebrenjtë si Mali i Tempullit. Hebrenjtë e nderojnë atë si vendndodhjen e dy tempujve biblikë dhe është vendi më i shenjtë në judaizëm, shkruan BBC.

Të martën, palestinezët u mbyllën në xhami pas namazit të Ramazanit në mbrëmje, mes raporteve se ekstremistët hebrenj donin të përpiqeshin të sakrifikonin një dhi të Pashkës në vend – siç bënin hebrenjtë në kohët biblike përpara se romakët të shkatërronin tempullin e tyre atje.

Policia izraelite tha në një deklaratë se disa të rinj të maskuar fortifikuan xhaminë “me qëllim që të prishnin rendin publik dhe të përdhosnin xhaminë”.

“Pas përpjekjeve të shumta dhe të zgjatura për t’i nxjerrë ata duke folur pa dobi, forcat e policisë u detyruan të hyjnë në kompleks për t’i nxjerrë jashtë me qëllimin për të lejuar faljen e namazit të mëngjesit dhe për të parandaluar një trazirë të dhunshme. Kur policia hyri brenda, u hodhën me gurë dhe u gjuajtën fishekzjarrë nga brenda xhamisë nga një grup i madh personash”- thuhet nga oficerët izraelitë.

Zëdhënësi i presidentit palestinez Mahmoud Abbas dënoi sulmin izraelit, duke e përshkruar atë si një sulm ndaj besimtarëve myslimanë.

B.V/Shqiptarja.com

TAG:
• al aksa
• Palestine
• Izrael