Përplasje për Groenlandën/ SHBA-të paralajmërojnë Evropën: Beteja jonë është e vërtetë

"E ardhmja e Groenlandës nuk është një çështje për Bashkimin Evropian". Kështu është shprehur ministri i Jashtëm hungarez, Peter Szijjarto duke sinjalizuar se nuk do të mbështesë një deklaratë të përbashkët të BE-së kundër Donald Trump.

"Ne e konsiderojmë këtë si një çështje dypalëshe që mund të zgjidhet nëpërmjet bisedimeve midis dy palëve... Nuk mendoj se është një çështje e BE-së", tha Szijjarto.

Hungaria është një nga zërat më euroskeptikë të bllokut dhe qeveria e saj, e udhëhequr nga kryeministri Viktor Orban, shpesh ka bllokuar dhe vënë veton ndaj vendimeve të BE-së.

Budapesti gjithashtu është pozicionuar afër administratës Trump. 

Presidenti amerikan, Donald Trump thotë se Evropa duhet të përqendrohet te lufta në Ukrainë, jo te Grenlanda, dhe këmbënguli se do të ndjekë planin e tij për tarifa ndaj shteteve që dërgojnë trupa ushtarakë në ishullin arktik.

Në një intervistë të shkurtër telefonike me NBC News, Trump tha se do t'i godasë "100%" vendet evropiane me tarifa nëse nuk mund të arrihet një marrëveshje për Groenlandën.

“Evropa duhet të përqendrohet në luftën me Rusinë dhe Ukrainën, sepse, sinqerisht, e shihni se çfarë u ka sjellë kjo atyre. Kjo është ajo në të cilën duhet të përqendrohet Evropa - jo Groenlanda.", theksoi Trump.

I pyetur nëse do të përdorte forcën për të pushtuar Groenlandën, presidenti tha: “Pa koment”.

Evropa nuk është e interesuar të fillojë një luftë me SHBA-në lidhur me ambiciet e Presidentit Donald Trump për të aneksuar Grenlandën, por blloku do të mbajë pozicionin e tij.

Kështu u shpreh shefja e politikës së jashtme të BE-së, Kaja Kallas.

“Nuk kemi interes të nisim një luftë, por do të qëndrojmë në pozicionin tonë. Evropa ka një sërë mjetesh për të mbrojtur interesat e saj. Kërcënimi i Trump për të goditur aleatët e tij me tarifa nëse nuk arrihet një marrëveshje për blerjen e Grenlandës nga SHBA-ja “nuk është mënyra e duhur për ta bërë këtë”, tha Kallas në një postim në rrjetet sociale.

Denmark and Greenland are not alone.
Good to see my colleagues @troelslundp and Vivian Motzfeldt.

Arctic security is a shared transatlantic interest, and one we can discuss with our US allies.
But tariff threats are not the way to go about this. Sovereignty is not for… pic.twitter.com/AbIhQ2ZI13

— Kaja Kallas (@kajakallas) January 19, 2026

Kryeministri norvegjez Jonas Gahr Støre konfirmoi se të dielën kishte marrë një mesazh me tekst, si përgjigje të një mesazhi që ai dhe presidenti i Finlandës, Alexander Stubb, i kishin dërguar Donald Trumpit.

Støre tha se ata kishin shprehur kundërshtimin ndaj rritjeve të propozuara të tarifave në lidhje me mosmarrëveshjen për Groenlandën dhe kishin theksuar nevojën për ulje të tensioneve, duke propozuar një telefonatë trepalëshe po atë ditë.

Støre vuri në dukje se Çmimi Nobel për Paqen jepet nga një komitet i pavarur, dhe jo nga qeveria e Norvegjisë. Trump nuk e ka fshehur dëshirën e tij për t’u nderuar me këtë çmim vjetor.

Ai ka këmbëngulur gjithnjë e më shumë se Shtetet e Bashkuara duhet të marrin kontrollin e Groenlandës për arsye të sigurisë kombëtare. Ishulli arktik, me popullsi të rrallë por i pasur me burime natyrore, është i pozicionuar në mënyrë strategjike për sistemet e paralajmërimit të hershëm në rast sulmesh me raketa dhe për monitorimin e anijeve në rajon.

Në një mesazh drejtuar kryeministrit norvegjez, Trump fajësoi Norvegjinë për faktin që nuk ia kishte dhënë atij çmimin Nobel për Paqen dhe se nuk ka më prioritet të angazhohet më për paqen.

Kryeministri i Groenlandës thotë se nuk do të lejoj që ndaj vendit të tij të ushtrohet presion, teksa presidenti i SHBA, Donald Trumo ka kërcënuar me tarifa vendet që vendosin trupa ushtarake në ishull.

Në një postim në Facebook, Jens-Frederik Nielsen mirëpriti mbështetjen e kombeve të tjera, duke e quajtur atë një njohje të qartë se Groenlanda është një shoqëri demokratike me të drejtën për të marrë vendimet e veta.

 “Deklaratat e fundit nga SHBA-të, përfshirë kërcënimet për tarifa, nuk e ndryshojnë këtë qëndrim. Ne nuk do të lejojmë që të na bëhet presion. Ne qëndrojmë të vendosur për dialog, për respekt dhe për të drejtën ndërkombëtare.”, shtoi ai.

Nielsen mori pjesë në një protestë kundër kërkesës së presidentit amerikan që ishulli Arktik t'i cedohet SHBA-së, duke kërkuar që atij t'i lejohet të përcaktojë vetë të ardhmen e vet, përpara konsullatës amerikane në kryeqytetin e Groenlandës, Nuuk, në fundjavë.

Kina ka hedhur poshtë pretendimin e SHBA se ajo përbën një kërcënim për Groenlandën.

“Ne i bëjmë thirrje SHBA-së të ndalojë përdorimin e të ashtuquajturit ‘kërcënim kinez’ si pretekst për të kërkuar përfitime egoiste”, tha zëdhënësi i ministrisë së jashtme të Kinës, Guo Jiakun, gjatë një konference për shtyp në Pekin.

Reagimi vjen pasi Presidenti i SHBA-së, Donald Trump ka thënë se Shtetet e Bashkuara kishin nevojë për zotërimin e Groenlandës për t'iu kundërvënë kërcënimeve kineze dhe ruse në Arktik dhe për të zhvilluar atë që ai e ka quajtur Kupola e Artë për të mbrojtur Amerikën e Veriut nga raketat balistike.

“Kina e ka shprehur qëndrimin e saj në shumë raste për Groenlandën. E drejta ndërkombëtare, e mbështetur në qëllimet dhe parimet e Kartës së OKB-së, është themeli i rendit aktual ndërkombëtar dhe duhet të mbështetet”, shtoi Jiakun.

Këshilli Evropian do të zhvillojë një mbledhje të jashtëzakonshme lidhur me tensionet me SHBA, teksa presidenti amerikan, Donald Trump ka kërcënuar me tarifa vendet që do dërgojnë trupa ushtarake në Groenlandë.

António Costa, presidenti i Këshillit Evropian bëri thirrje për një takim të jashtëzakonshëm të liderëve të BE-së, që do të mbahet në Bruksel të enjten.

Costa ka thënë se pas konsultimeve me shtetet anëtare, udhëheqësit evropianë janë dakordësuar se tarifat e SHBA do të dëmtonin marrëdhëniet transatlantike.

Presidenti amerikan Donald Trump i ka dërguar një letër kryeministrit norvegjez, Jonas Gahr Store, ku ka shkruar për çështjen e Groenlandës.

Sipas mediave të huaja, në letrën drejtuar Kryeministrit norvegjez, Trump ka shkruar se tani mund të mendojë për atë që është e drejtë dhe e përshtatshme për Shtetet e Bashkuara dhe se "bota nuk është e sigurt nëse nuk kemi kontroll të plotë dhe total të Groenlandës".

Trump ka shkuar edhe më tej kur ka thënë se përderisa nuk ka marrë çmimin Nobel për paqen, nuk ndihet më i detyruar që të mendojë për paqen.

"Meqenëse vendi juaj ka vendosur të mos më japë Çmimin Nobel për Paqen, pavarësisht se kam ndihmuar në ndalimin e më shumë se tetë luftërave, nuk ndihem më i detyruar të mendoj ekskluzivisht për paqen, edhe pse ky do të jetë gjithmonë një objektiv mbizotërues", shkruante më tej Trump në letrën e tij.

Letra e siguruar nga Bloomberg, e lidh qartë dështimin e Çmimit Nobel me kërcënimet ndaj Groenlandës. "Bota nuk është e sigurt nëse nuk kemi kontroll të plotë dhe total mbi Groenlandën", përfundon ai në letër.

Kujtojmë se çmimi Nobel për Paqen, në fakt, nuk jepet nga qeveria norvegjeze, por nga një komitet i pavarur, i cili vendosi t'ia japë Çmimin Nobel për vitin 2025 udhëheqëses së opozitës venezueliane, Maria Corina Machado.

“Danimarka nuk mund ta mbrojë Groenlandën nga Rusia apo Kina, dhe pse duhet të ketë të drejta pronësie gjithsesi? Nuk ka të dhëna të shkruara; është thjesht se qindra vjet më parë një anije zbarkoi atje, por edhe ne kishim anije që zbarkuan atje", vijon më tej letra e Trump.

"Unë kam bërë më shumë për NATO-n se kushdo tjetër që nga themelimi i saj dhe tani NATO duhet të bëjë diçka për Shtetet e Bashkuara", shkroi Trump.