Perry sjell “kotësinë” e klasit
britanik në Galerinë Kombëtare

Një ekspozitë që tregon historinë sesi britanikët e perceptojnë konceptin e shijes dhe klasit, e gjitha kjo e ndjekur nga jeta dhe vdekja e personazhit imagjinar Tim Rakewell, do të çelet së shpejti në Galerinë Kombëtare të Arteve. Ekspozita ka për autor Grayson Perry-n.

Galeria Kombëtare e Arteve dhe British Council njoftojnë për çeljen e ekspozitës “Kotësia e Dallimeve të Vogla” nga data 2 nëntor deri më 5 dhjetor.

Grayson Perry është fitues i çmimit “Turner”, një nga çmimet më prestigjioze bashkëkohore në Mbretërinë e Bashkuar. Një fakt interesant rreth këtij personazhi është se ai e tërhoqi çmimin i veshur si një grua, e cila përfaqëson alter egon ‘Claire’, për të treguar interesin e tij në identitet, që gjendet gjithashtu në artin e tij.

“Tirana është qyteti i fundit në Ballkanin Perëndimor pritës i ekspozitës. Më parë, ekspozita u mbajt në Novi Sad, Prishtinë, Sarajevë edhe Banja Luka. Hyrja në ekspozitë është falas.”, njoftojnë organizatorët.

Grayson Perry për veprat e tij përdor mediat tradicionale si tapiceritë, qeramikat dhe grafikat për të shqyrtuar joshjen e tij me problemet bashkëkohore sociale.

Kjo ekspozitë përmban gjashtë tapiceri, 8 gravura origjinale të punës së William Hogarth, 20 riprodhime dhe 3 dokumentarë të krijuar nga udhëtimet e Perry-t në 3 rajone në Angli, ku ai u frymëzua për ekspozitën.

“Kotësia e dallimeve të vogla” është bashkëpronësi e The British Council Collection, Arts Collection e Southbank Centre në Londër.

[gallery]24418[/gallery]

Redaksia Online
J.Sh Shqiptarja.com